Ҡайнар көн

Беҙ тот та шул яҡҡа сап. Йәйәү түгел инде, Асҡар Кинжәлиев машинаһына ултырып. Ауыл башлығы тәүҙә музей мәшәҡәттәрен тыңлап (унда эш әле муйындан), аҙаҡ яңы мәктәп тирәһендәге ығы-зығы менән булып, матур ғына итеп барып юбилей сәйе эсәм тигән кеше, бына төтөн күренгән яҡҡа елә. Юлда барышлай әле береһенә, әле икенсеһенә шылтырата (абзый, давай. тиҙ генә К- 700-ыңды, бабай, Т-150 ҡайҙа, Ермолай, һеҙ килеп етәһегеҙме бөгөн-юҡмы), ауылға ғына ут барып етмәһен. Күҙ асып йомған арала ялҡын ялмаған яланға барып еттек, Бында мәхшәр. Ҡул аҫтында һиптерер бер нәмә юҡ, ауыл пожарниктары һыуҙарын һипте лә кире боролдо, йәнә һыу алырға, уңасы К-700 күренде, янғындың тирә-яғын һөрә башланы. Беҙҙең ҡулда көрәк тә ағас ботағы. Киров хужалығының елле генә бер һалам кәбәне янып ултыра, ниместәр бомбить иткән ер һымаҡ, ҡурҡыныс. Һелтәп-һуғып утты һүндереп ҡараған булабыҙ, ҡайҙа, ут беҙҙән мыҫҡыллап көлә генә ахры, ыһ та итмәй, өҫкә менеп килә. Бер аҙҙан йәнә бер трактор күренде, һыуҙы әллә нисә тонна тейәгән, был да хужалыҡ техникаһы. Ағастарҙы ялмай башлағайны ут, машиналарҙы күргәс (Ермолаево янғын һүндереүселәре лә килеп етте) Асҡар Исәт улы, төтөн мөһөрө баҫҡан битен һөртөп, еңел тын алды.