"Поклонник"

Минең әлеге йәшәгән районда бер көнө ҙур ғына байрам сараһы уҙҙы. Эшем буйынса тегеләй-былай сабып йөрөп ятам. Бына бер ваҡыт бер апай: "Һеҙ "Юшатыр"ҙа эшләгән Розалиямы әллә, тимәһенме. Аптырап киттем, хатта. Күмертауҙан әллә күпме йыраҡлыҡта ятҡан районда һине танып торһондар әле. Аптырамаҫ ерҙән аптырарһың.
- Эйе, - тинем таныш түгел апайға.
- Мин бит "Юшатыр"ҙың әллә ҡасанғы поклоннигы, гел һеҙҙең яңылыҡтарҙы уҡып, күҙәтеп барам. Розалиябыҙ эштән китә, тип яҙғайнылар шул. Ҡайҙа китте икән, тип уйлап йөрөй инем, ә һеҙ беҙгә килгәнһегеҙ икән, - тип хәбәрен теҙҙе шундай рухлы, матур, мөләйем, минән 1-2 йәшкә генә олораҡ башҡорт апайы. Һөйләшеп-танышҡас, уның райондың бер силсәүит башлығы икәнен белеп ҡалдым.
Сит район гәзитен, хатта, унда эшләп киткән хәбәрселәрҙе, әллә ҡайҙа, республикабыҙҙың икенсе төбәгендә белһендәр әле - ғорурланмаҫ ерҙән ғорурланырһың.
Мине үҙ итеп ҡабул иткән Күмертау ҡалаһы һәм Көйөргәҙе районы халҡына, яратҡан "Юшатыр" гәзите уҡыусыларына һағынышлы, ҡайнар сәләмдәр менән Розалия Назарова, Ҡырмыҫҡалы районы.