Һәр саҡ йылмайып торһон

Яҡшымбәт биләмәһе ныҡ ҙур биләмә, 12 ауылды үҙ эсенә ала. Район хакимиәтенән кемдер йөрөп сығайым әле быларҙы тип килһә, яртыһын үтә лә, йонсоп, ҡул һелтәй: булды, етте бөгөнгә, әйҙә, иртәгә дауам итербеҙ. Ашат та, ҡайтам.

Оло ауыҙға ни кәрәк, кесеһенә лә шул кәрәк тиҙәр ҙә, барыбер олорағына күберәк кәрәктер ул. Миҫалға, ауыл хакимиәттәренә квартал һайын бүленгән аҡсаны ҙуры ла шул уҡ суммала ала, бәләкәйе лә.

Быныһы һүҙ ыңғайына ғына әйтелгәне. Нимә-нимә, ҡала табиптары Яҡшымбәт яҡтарын иғтибарһыҙ ҡалдырмай. Улар ҙа бер көндә генә урап сыға алмай был тирәләрҙе, теге көн Яҡшымбәттең үҙендә халыҡты ҡабул итте, кисә Көйөргәҙе ауылына барғандар. Байтаҡ кеше терапевт, гинеколог, окулист, кардиолог, невролог, хирургҡа күренгән, УЗИ үткән.

Оло ауыҙ тип сағыштырыу, бәлки, яҙыҡтыр ҙа, ямаҡ яңғырай һымаҡ, А тигәс, Б тип тә әйтергә кәрәк: был ауыҙ буш булмаһын, һәр саҡ, ап-аҡ тештәрен күрһәтеп, йылмайып торһон.