МАЛДАР ҠУРАҒА ИНДЕ

Көнөнә 4% ҡуйылыҡтағы, 84% тауарлылығындағы 219,7 центнер һөт һатыуға оҙатыла. Райондың барлыҡ фермаларында ла тиерлек малдар ҡышҡы ҡураларға ингән.

Ҡотлоюл фермаһында бөгөнгө көндө 250 баш һауын һыйыры һәм 200 баш һимертеү өсөн эре мал бар. Бында эре малдың һаны былтырғы кимәлдә ҡалған. 5 октябрҙән уларҙың барыһы ла ҡышҡы ҡураға инде. Ферма мөдире Нәғим Аҡһаров: «Ҡураға инеү менән һөт әҙерәк кәмене, әммә һөттөң ҡуйылығы артты. Йәй көндәре һөттөң ҡуйылығы 3,8% булһа, әле 4,1 — 4,2%-ҡа барып етә. Бында әле тәүлегенә 1700 литр һөт һауып алына. Һауынсыларыбыҙ Маһинур Аҡһарова, Миңлебикә Аҡһарова, Фидәлиә Боҫҡанова, Асия Ғафарова, Фирүзә Арыҫланова үҙ эштәрен яратып башҡара. Малсылар Урал Аҡһаров, Иҙрис Боҫҡанов һәм Юнир Аҡһаров малдар ҡураға инһә лә, һауа торошона ҡарап, уларҙы 2-3 сәғәт йөрөтөп алып килә. Һимертелгән эре малдарҙы ҡараусы Илдус Аҡһаров менән Ирек Яманһаров та тырышып эшләй, артым һәйбәт», - ти. Шуны ла әйтергә кәрәк: Ҡотлоюл фермаһында һауынсылар һәм малсылар өсөн «Искра» хужалығы етәксеһе Рәмил Ғиниәт улы Мостафин бар шарттар ҙа тыуҙырған. Унда бик күп эштәр техника ярҙамында башҡарыла. Һауынсыларға ла хәҙер ауыр биҙрәләр күтәреп йөрөргә түгел. Малдар һәр ваҡыт таҙа, элекке ваҡыттарҙағы кеүек уларҙы йыуырға ла кәрәкмәй. Бригадирҙары Урал Ибраһимов та уларға һәр ваҡыт ярҙамға килергә әҙер. Эш хаҡы ла арыу һәм ваҡытында бирелеп тора.