+21 °С
Облачно
АУЫРТҠАН ЕР
9 Ноября 2021, 05:31
Тереләй һуйыу
31 АВГУСТ, 2017 йыл. https://youshatir.ru/articles/здравоохранение/2017-08-31/orau-ar-auyr-buldy-214128"Яңы Таймаҫ ФАП-ы бик иҫке, капиталь ремонт талап ителә. Был ауылға киләсәктә 80 квадрат метр майҙанлы «Модуль ФАП-ы» төҙөү ҙә планлаштырыла".
Тереләй һуйыу
4 йыл элек яҙылған хәбәр. Ул саҡта Башҡортостандың Һаулыҡ һаҡлау министры Әнүәр Бакиров булған. Министрҙар килә торҙо, китә торҙо, Яңы Таймаҫ ФАП-ы шул көйө тора торҙо. Был темаға беҙ генә, кәмендә, 6-7 тапҡыр яҙҙыҡ.
Вәғәҙәләр тыңлана торҙо. Быйыл республикала 44 модулле ФАП төҙөләсәк, йәл, был исемлектә беҙ юҡ. Улай-былай, аҡса артып ҡалһа, тәү сиратта Таймаҫта була ФАП тинеләр - аҡсалар артып ҡалмаясаҡ. Был турала бөгөн ҡаланың баш табибы Олег Астахов белдерҙе. Бер ҡышҡа ҡуян тиреһе лә сыҙаған, бәлки, киләһе йылда булыр?
- Киләһе йылда ла булмай, - яуап, таймаҫтарҙы ғына түгел, бөтәбеҙҙе лә тереләй һуйҙы.
Ниңә ҡайһы бер райондарҙа 3-4 ФАП-ты бер юлы ултырта ла ла ҡуялар (быйыл Кушнаренкола 3, Яңауылда - 6 (!!!) яңы ФАП төҙөләсәк) , ә беҙҙә берәү ҙә юҡ (былтыр Зәк-Ишмәткә яңы ФАП "яңғылыш" эләкте, зәктәр бәхетенә, бюджетта аҡса артып ҡалғайны).
Олег Анатольевичтың яуабы ошолай:
- Барлыҡ документтарҙы Мәскәү ҡарай, унда беҙ Күмертау дауаханаһы булып сығыш яһайбыҙ, тегеләр был ҡала икән тип уйлай ҙа ҡуя, ҡалаға нимәгә ул модулле ФАП?
Ошондай хәлдәр. Ысынлап та, тереләй һуйҙылар кеүек. Әлегә Яңы Таймаҫ та, Яманғол да (унда ла яңы ФАП кәрәк) иҫкесә эшләп тора, был арала берәйһенең башына берәй нәмә килеп кенә төшмәҫ тип ышанғы килә.
Фотола: Яңы Таймаҫтың ФАП-ы.
