Кәрәкле һүҙ

Улдарын юғалтҡан әсәләр алдында шулай була. Кисә быны үҙебеҙҙә тойҙоҡ. Хәлдәр нисек, һаулыҡ һиңә, инәй.... барыһы ла шул тиклем баналь, мейенең төптәренә төшөп тә, нимәлер эҙләп, соҡсоноп ҡарайһың - юҡ. Бына бөгөн, ошо байрамда, йырлап-бейеп йөрөргә тейеш ине улдары, шап-шаҡтай булып, өйләнеп, эшләп, янып-көйөп, балалар үҫтереп, ә әсәләр үҙҙәре улар бүләк иткән ейәндерен тупылдатып яратып...
Кисә улдары яуҙа ятып ҡалған әсәләр менән осрашыу ҙа булды. Беҙ был сарала булманыҡ (тирмәгә кереп кенә инәйҙәрҙе алдараҡ күреп сыҡҡайныҡ) - фотолар ғына ебәрҙеләр. Беҙҙең тел зәғиф тә, табын артында ултырғандар, моғайын, тейешле һүҙҙәрҙе таба алғандарҙыр тибеҙ. Яра һулҡылдауын саҡ ҡына булһа ла баҫа алғандарҙыр.