Беҙҙең бәхет - һеҙҙең ҡулдарҙа

Дилә Батурина, «Йәшлек» мәҙәниәт йортоноң китапханасыһы:
- Сара ныҡ оҡшаны, барыһы ла матур итеп ойошторолған, уны үткәреү өсөн күп көс, сығым кәрәк булғанлығы күренеп тора. Был форум һәр бер ҡатын-ҡыҙ бәхетле булырға хоҡуҡлы икәнен аңларға ярҙам итәлер. Республикабыҙ башлығы сәләмләү һүҙен әйткәндә: «Ҡатын-ҡыҙ бәхетле икән, тимәк ир-аттар ҙа бәхетле, беҙҙең бәхет тулыһынса һеҙҙең ҡулда» ,-тине. Артабан, төрлөбөҙ төрлө тематик майҙансыҡтарға йүнәлдек: кемдер һаулыҡ, кемдер балалар тәрбиәләү, кемдер шәхси эшҡыуарлыҡ һәм башҡаларға. Мин коммерцияһыҙ ойошма тип аталған майҙансыҡта булдым, бында унға яҡын спикер беҙҙе үҙ эштәре менән таныштырҙы. Был матур саранан тик ыңғай тәҫьораттар менән ҡайттыҡ, барыһы ла ныҡ оҡшаны. Ҡыҙғанысҡа бөтә майҙансыҡтарҙы ла был ике көндә ҡарап өлгөрөп булмай. Шуға күрә, бөгөнгө көндә модаға инеп барған форумды, райондарға йөрөп күрһәтергә кәрәк, тигән уйҙа таралышты барыһы ла. Был фекерҙе ойоштороусыларҙың береһе, башлығыбыҙҙың тормош иптәше Каринэ Хабирова ла хупланы, бөгөнгө көндә 13 район форумды күрергә теләк белдереүен дә әйтеп үтте.

Был сара тураһында тулы материал үткән һанда сыҡты.