Ауырлыҡтарға бирешмәй улар

Йома көнө районда бер юлы ике ҙур байрам — үтеп киткән Ауыл хужалығы һәм эшкәртеү сәнәғәте хеҙмәткәрҙәре көнө һәм етеп килгән Халыҡтар берҙәмлеге көнө билдәләнде.

Байрамға килгән ҡунаҡтарҙы Бахмут ауылы мәҙәниәт йортонда районыбыҙҙың төрлө милләт вәкилдәре йыр-моң һәм икмәк-тоҙ менән ҡаршы алды. Артабан сарала ҡатнашыусыларҙы фойела урынлаштырылған стендтар янында һәр хужалыҡ етәксеһе үҙҙәренең эш алымдары, уңыш-ҡаҙаныштары менән таныштырып үтте.

Байрамдың тантаналы өлөшөн район хакимиәте башлығы Юлай Ильясов асты һәм район халҡын байрамдар менән тәбрикләне.

- Барлыҡ булған беҙҙең байлығыбыҙ ул - беҙҙең еребеҙ һәм кешеләребеҙ. Беҙ район халҡы менән ғорурланабыҙ. Һәр үҫтерелгән уңыш, һауылған һөт артында хеҙмәтсәндәрҙең еңел булмаған хеҙмәте ята. Быйылғы йылды яҡшы күрһәткестәр менән тамамлайбыҙ. Район республика буйынса алдынғылар рәтендә, - тине ул һәм БР Башлығы Радий Хәбиров исеменән дә ҡотлау һүҙҙәрен уҡып ишеттерҙе. Юлай Талха улы район хужалыҡтарына I, II, III дәрәжә дипломдары, иң лайыҡлы ауыл хужалығы хеҙмәтсәндәренә район хакимиәтенең Почет грамоталарын һәм Рәхмәт хаттарын тапшырҙы. Күптән түгел Өфөлә үткән ат сабышы ярышында Көйөргәҙе районын 2-се урынға сығарған Айбулат Әдрәхимовты һәм уның әсәһен тәбрикләп, рәхмәт белдерҙе. Фермер Дамир Хәйбуллин егеткә йүгән тотторҙо һәм ҡолон бүләк итте.

РФ Дәүләт Думаһы депутаты Зариф Байғусҡаров сығышында:

- Көйөргәҙе районы игенселек буйынса хәүефле зонаға ҡараһа ла, бирешмәй, ауыл хужалығы тармағын үҫтерә. Бында «Ватан», «Искра», Киров исемендәге эре хужалыҡтар яҡшы күрһәткестәргә өлгәшә. Ошондай энтузиаст хужалыҡтар күберәк булһын ине. Беҙҙә үҙҙәре үҫтереп, үҙҙәре эшкәрткән хужалыҡтар бармаҡ менән генә иҫәпләрлек. Һеҙҙең «Ватан» хужалығынан сеймалды эшкәртеп һатыу буйынса өлгө алырға була, - тине һәм ауыл хужалығы хеҙмәтсәндәренә изге теләктәрен әйтте. Зариф Закир улы «Южурал-ойл»дың генераль директоры Зиннур Исхаҡовҡа һәм Яҡшымбәт фермаһы мөдире Рим Сатаровҡа үҙенең Рәхмәт хаттарын тапшырҙы, ә район КФХ-лары рәйесе Марс Сафинға сәғәт бүләк итте. Шулай уҡ ул Свобода ауыл советы хакимиәтенең элекке башлығы Сания Сәйетбатталоваға Дәүләт Йыйылышы-Ҡоролтай исеменән Почет грамотаһы һәм райондың атҡаҙанған ауыл хужалығы хеҙмәткәрҙәренә Башҡортостандың 100 йыллығы миҙалдары тапшырҙы.

БР Ауыл хужалығы министры урынбаҫары Ревнер Бәйтуллин:

- Бер ниндәй ауырлыҡтарға ҡарамай ауылда ҡалғанығыҙ өсөн рәхмәт һеҙгә. Бер ниндәй һауа торошо шарттарына ҡарамай, яҡшы уңыш алыуға ла өлгәштегеҙ, - тигән маҡтау һүҙҙәрен әйтеп, республика буйынса күрһәткестәрҙе лә барлағас, райондың бер нисә алдынғы ауыл хужалығы хеҙмәткәренә БР Ауыл хужалығы министрлығының Почет грамоталарын тапшырҙы.

Район ЗАГС бүлеге начальнигы Светлана Иванова 50 йыл бергә йәшәүсе Рәүеф һәм Райхан Ҡаранаевтарҙы һәм 60 йыл бергә ғүмер итеүсе Хөрмәт һәм Лена Киреевтарҙы тәбрикләне. Уларға Радий Хәбиров исеменән ҡотлау хатын да уҡып ишеттерҙеләр. Был ике ғаилә лә бар ғүмерен ауыл хужалығына бағышлаған. Хөрмәт Әхәт улы менән Рәүеф Бәҙретдин улы — икеһе лә республиканың атҡаҙанған ауыл хужалығы хеҙмәткәрҙәре.

Байрам район артистары әҙерләгән матур концерт программаһы менән тамамланды.

Розалия НАЗАРОВА

Автор фотолары