+23 °С
Ясно
Яулыҡ көнө, матур яулыҡтарҙың
Ниндәйе юҡ икән үҙемдә?
Яулыҡтарға ҡарап хәтирәгә
Бирелдем мин әле бөгөн дә.
Француз яулыҡ – инәм бүләге ул,
Ҡәҙерләп тә һаҡлар иҫтәлек.
Ябынырға яҙһын яулыҡтарын,
Биҙәгенә иҫең китерлек.
Ябынамын яулыҡ, бик яратып,
Аш – һыу тирәһендә булғанда.
Яулыҡтарым мине һаҡлай кеүек,
Күҙҙәргә моң, һағыш тулғанда...
Яулыҡ – ябай япма, ҡатын – ҡыҙға,
Ул яулыҡтар ябай, килешле.
Ап – аҡ яулыҡ ябам киленемә,
Һәр беребеҙ ерҙә өлөшлө.
Аҡ яулыҡтай булһын күңелкәйең,
Юлдарың аҡ булһын – теләгем.
Йылдар үткәс, мине хәтерләрһең,
Ҡарап аҡ яулыҡтың биҙәген...
Руша Солтанғолова, Ермолаево ауылы