КҮРШЕ ХАҠЫ – ТӘҢРЕ ХАҠЫ

Йомағужа ауылының Тыныслыҡ һәм Йәштәр урамдарында йәшәүселәр һый-ниғмәттәрҙән бына тигән өҫтәлдәр әҙерләгән. Улар араһында 60 йыл бергә татыу ғүмер иткән Зәки менән Зөлфирә Әмировтар, ауыл аҡһаҡалдары ла бар. Был көндө олоһо ла, кесеһе лә байрам итте. Балалар рәхәтләнеп велосипед уҙышында ярышты, йырланы, бейене. Изге Рамаҙан айында мәрхүмдәрҙе иҫкә алдылар, уларҙың рухына хәйер тараттылар. Йомағужаларҙы Күршеләр көнө менән ҡотларға Илкәнәй ауыл хакимиәте башлығы Тимур Нәсибулла улы Иҙрисов та килде. Байрам ике урамды берләштергән, яҡынлаштырған күңелле бейеүҙәр менән тамамланды. Гармунсы Рәмзит Ҡолоев барыһын да күңелдәре булғансы бейетте. Йомағужалар Күршеләр көнөнән бик ҡәнәғәт ҡалды һәм Мәүсилә Исмәғиловаға рәхмәт әйтте.