Йөрөп ҡалайыҡ әле

Бөгөнгө һабантуйҙа ул-был хәүеф һиҙеп, алан-йолан ҡаранып йөрөгән кеше күренмәне, киреһенсә, осрашһалар, әллә ҡасандан күрешмәгән ҡоҙалар ише, ҡосаҡлаштылар, арҡаларын тупылдаттылар. Ана, Зөйбәйеров Айрат, бына Әлфиә Зыкова, атаҡ, Әхәт Ҡотлоәхмәтов та бында, бәй, Илнур Туйгилдин да ҡайтҡан - уларҙы нисек ҡосаҡламайһың?

Өфөнән дә ҙур ҡунаҡтар килгән - уларһыҙ байрам-байрам булмай, вице-премьер Ирек Сәғитов, Ауыл хужалығы министры урынбаҫары... Уларҙы, шартына килтереп, ҡаршы алдылар, бына һеҙгә сәк-сәк, ҡымыҙ, икмәк... Ҡурай һыҙғырҙы, матур ҡыҙҙар өйрөлөп бейене. Һәм китте... Ошо һорау беҙҙе генә борсоймо икән - ниңә байрам һайын кешегә күмәртәләп бүләк өләшәләр? Районда ла, ҡалала ла грамота алмаған, миҙал таҡмаған кеше ҡалманы кеүек, былай бүләктең бәҫе төшә һымаҡ. Береһен дә үпкәләтке килмәй, шулай ҙа, балды ла, күпләп ашаған һайын, ул биҙҙерә. Әле лә 60--лап кешегә грамота-исемдәр тараттылар, халыҡ сәғәттән ашыу барған танатаны ҡарай-ҡарай арыны. Бөтәһе лә беҙҙә герой- ауыл ерендә, спорт, мәғариф, йәштәр, ҡарттар өлкәһенә дан ҡаҙанған.

Тирмәләр шәп, нмиә-нимә, беҙ тирмәләрҙе ҡорорға, биҙәргә ныҡ оҫта. Һәр силсәүит тирмаһен ҡарап сыҡтыҡ- бөгөндән тулайым күтәр ҙә Парижға күргәҙмәгә алып бар - ҡурсаҡ һымаҡтар. Өҫтәлдәрендә зәм-зәм һыуы ла, күгәрсен һөтө генә юҡ.

Тирмә тигәндән, һәр ауыл хакимиәте юҡты бар итеп әҙерләнгән, тик конкурс быйыл булмай икән. Юҡ, береһе лә буш ҡалмай, аҙаҡ һәр силсәүиткә сертификат бирәбеҙ тинеләр - ҡаҙ сепейе алырға. Былай булғас, ауылдар ҡаҙға байыр инде, был да файҙа, ҡаҙ ите тәмле була.

Парад - Һабантуйҙа иң кәрәкле сара, ҡарағыҙ, ауыл алдынғылары, һабан һөрөүселәр, иген үҫтереүселәр китеп бара тип, барыһы хайран ҡалып торорға тейеш. Тик... парадта хужалыҡтар булманы тиерлек. Ауыл хакимиәттәре хужалыҡһыҙ ғына үтте, мәғариф, йәнә йәштәр, ҡул болғап, үтте. Искра, Киров, Ватан, ДРСУ, Элеваторҙың арманһыҙ булып эшләгән халҡы күҙгә салынманы. Тамашаны тамаша итер өсөн ҡайҙандыр дөйә алып килгәндәр, хатта ишәк йөрөп ята, ә хужалыҡтар юҡ. Бер ауыл башлығынан, түҙмәй, һораныҡ: ҡайҙа хужалыҡ, атаҡ, уларҙың байрамы түгелме ни? Тегеһе яуырын һикертте, күҙҙәрен йәшерҙе: әллә, мин политикаға ҡыҫылмайым, һәм, тиҙ-тиҙ атлап, китеп барҙы. Һабантуйҙы байрам ғына тиһәк, ул, баҡһаң, сәйәсәт тә икән.