+31 °С
Ясно
Байрамдар
30 Августа 2021, 04:20
Байрам кәйефе һүрелмәһен
#НацфиналУфа #Нацфинал2021 #WorldSkillsRussia "Йәш профессионалдар (WorldSkills Russia) сараһы (байрамы) - аҙаҡҡы көндәрҙә иң күп һөйләнгән, төрлө фекерҙәр тыуҙырған сара. Рәсми яңылыҡтарҙың 10-ауһының 8-е мотлаҡ ошо WorldSkills хаҡында булды, был байрам хатта иген уңмауын, Башҡортостандың байтаҡ ялан-ҡырҙары, ауылдары яныуын да оноттора яҙҙы. Уйын эш түгел - илдең 76 төбәгенән килделәр ярышырға, был байрам эшсе һөнәренә ҡыҙыҡһыныу уятырға тейеш, республика башлығы әйтмешләй, барса йәштәргә юрист та экономист булырға түгел, ташсы, маляр, балта оҫталары беҙгә ныҡ кәрәк. Илдә "ҡара" эшселәргә ҡытлыҡ, бөтәһенең дә таҙа, йылы офиста ултырғыһы килә.
Байрам кәйефе һүрелмәһен
Масштаблы сара булғастын, унда беҙҙекеләрһеҙ буламы - юҡ, әлбиттә. Студенттарыбыҙ ҡатнашты (Күмертау юғары уҡыу йортонан), улар өсөн ҡыуанып ултырҙыҡ - яҡты киләсәгебеҙ бар икән. Бына Данил Акилов та, район башлығы урынбаҫары, барған икән, уның фотолары район йәштәрен яҡшы һөнәр эйәләре булыуға этәрер тип ышанғы килә.
Розалина ниңә унда юҡ тип аптырап ҡына ултырһаҡ, Р. Ибраһимова ла шунда йөрөп ята. Унһыҙ булһа, был мәртәбәле сараның мәртәбәһе барыбер кәмер һымаҡ ине.
Бар донъяға шауланыҡ, артабан алға ҡарап китергә кәрәк - илгә эшсе ҡулдар кәрәк. WorldSkills-тан һуң, улар артыр тигән өмөттә ҡалабыҙ. Йәнә бер нәмә: эшселәр артһа, уларға Башҡортостанда лайыҡлы эш хаҡы түләгән эш урындары ла булһын ине. Һөнәр алып, Себер сығып китһәләр, байрам кәйефе һүрелер төҫлө.
