+19 °С
Дождь
Байрамдар
6 Октября 2021, 09:32
Ситеге лә килеп сығыр
Беҙ бында ҡырҡмаһа ҡырҡ булдыҡ бит инде, барыһы ла яҡшы таныш, яңырһа ла, һаман тыуған йорт кеүек, бына бында бер боролош, бында икенсеһе, ә анауында директор үҙе ултыра торған урын. Альфира Ниғмәтуллина. Кермәй генә үтеп китергә ине, тик... әллә нимәһенә аяҡтар ошонда тартты, бәлки, ике көндән Ғ. Әлмөхәмәтов музейын рәсми асыу буласаҡ икәнен белгәнлектәндер. Альфира Салауат ҡыҙы әллә бынан ҡайтмай эшләй, ҡасан килмә, ошонда, әле лә беҙҙе, һәр саҡтағыса, йылмайып ҡаршы алды. Эштәре теүәл тиһәң дә була, элек ҡараңғы бина (бында килеп кереү менән сығып ҡасҡы килә торғайны, ҡотһоҙ ине, нимәһен йәшерергә?) яҡтырған, барыһы ла таҙа, бөхтә. Хет министр үҙе килеп ҡараһын, оят булмаясаҡ.
Ситеге лә килеп сығыр
Әйткәндәй, килә ул министр, мәҙәниәттеке - Шафиҡова Әминә, беҙҙәге музейҙағы ремонт тураһында ишеткән дә, үҙе килеп ҡарарға булған. Шуға Яңы Морапталда аҙ ғына өтәләнеү күҙәтелә. Беҙҙән алда ғына райондың мәҙәниәт әһелдәре, етәкселәре лә булып киткән - уйын эш түгел - Министр килә!
Яңы Мораптал мәҙәниәт йорто ялтлап торорға тейеш, анауы үләндәрегеҙҙе сабығыҙ, иҙәнгә йәбешкән һағыҙҙарҙы аҡтарығыҙ.. Юҡ -бар һорап аптыратмағыҙ Әминә Ивниевнаны.
- Атаҡ, беҙгә милли кәстүмдәр кәрәк тә баһа. Бейергә сыҡһаҡ, оят, ситек урынына кәлүш тигән кеүек. Ҡатын-ҡыҙҙар милли кейеме лә кәрәк, әле булған иҫкеләренә береһен дә һыйҙырып булмай.
Ҡыҫҡаһы, иртәнән һуңға беҙҙе ҙур тамаша көтә - музей асыу, министр килеү. Бәлки, бер ҡыҙып киткәндә, ситеге лә килеп сығыр.
