ҺАЛЫМЫҢДЫ ВАҠЫТЫНДА ТҮЛӘП ӨЛГӨР!

Һалым түләү өсөн белдереү ҡағыҙҙары кешенең йәшәгән адресы буйынса түләү срогына 30 эш көнө ҡалғанға тиклем йүнәлтелә. «Ундай ҡағыҙ килмәһә, нишләргә һуң?» - тигән һорау күптәрҙе борсой.

Бындай ҡағыҙ киҫәген алмағандар үҙҙәренең йәшәгән урындарындағы йәки мөлкәте урынлашҡан ерҙәге һалым органдарына мөрәжәғәт итеү хоҡуғы ала. Шулай уҡ яҙма рәүештә почта аша, «Һалым түләүсе физик шәхестең шәхси кабинеты», «Обращение в УФНС (ИФНС) России» сервистары ярҙамында Федераль һалым хеҙмәтенә www.nalog.ru хат ебәреп була.

Һалым түләү ҡағыҙҙары түбәндәге осраҡта ебәрелмәй:

1) Һеҙҙең һалым льготаһы булып, һеҙ һалым түләүҙән азат икәнһегеҙ;

2) Һалымдың дөйөм суммаһы 100 һумдан кәм булһа;

3) Әгәр һеҙ 50 кв. метрҙан да кәмерәк майҙанлы торлаҡ йорт, 2 кв. метрҙан бәләкәйерәк фатир, 10 кв. метрҙан бәләкәйерәк бүлмәнең хужаһы булһағыҙ.

Һалым аҡсалары үҙебеҙ өсөн тотоноласағы хаҡында оноторға ярамай. Мөлкәт һалымдарының күп өлөшө бюджетҡа китә. Шунан уҡытыусыларға, тәрбиәселәргә, медиктарға эш хаҡы, пенсиялар, стипендиялар түләнә. Юлдарҙы тәртиптә тотоу, бушлай медицина һәм белем биреү хеҙмәттәрен башҡарыу өсөн дә һалым аҡсаһы тотонола.

Һалымығыҙҙы ваҡытында түләп өлгөрмәһәгеҙ, 2 декабрҙән алып пеня өҫтәлә башлаясаҡ. Шуға күрә 1 декабргә тиклем өлгөрөп ҡалығыҙ.