ҠАЙҘА БАРАЙЫҠ, ҠАЙҘАН АЛАЙЫҠ?

Шундай һорау бирҙе беҙгә телефон аша Мәҙинә апай. Был проблемаға ҡарата силсәүит башлыҡтары ла яуап эҙләй. Шуға күрә беҙгә тағы ла Ишембайҙағы һалым инспекцияһының һалым түләүселәр менән эшләү бүлеге начальнигы урынбаҫары Эльвира Роберт ҡыҙы Шумаеваға мөрәжәғәт итергә тура килде.

- Бында беҙҙең ғәйеп юҡ. Бар кешегә лә ваҡытында белдереү ҡағыҙын ебәрәбеҙ. Рәсәй почтаһы халыҡҡа ул ҡағыҙҙарҙы ваҡытында алып барып еткермәй. Былтыр Салауат ҡалаһында һалым инспекцияһы ебәргән хаттарҙы почта хеҙмәткәрҙәре ваҡытында халыҡҡа алып барып еткермәгәндәр ҙә, сүп-сар багына түккәндәр ҙә ҡуйғандар. Бына шундай осраҡтар ҙа булғылай, ҡыҙғанысҡа. Шуға күрә ауыл халҡына үҙҙәренә иң яҡын булған һалым инспекцияһына мөрәжәғәт итергә тура килә инде. Көйөргәҙе районы халҡына был осраҡта Күмертауға барырға кәрәк буласаҡ. Шуны ла әйтеп үткем килә: 16 ноябрҙән 16 декабргә хәтлем һалым инспекцияларында эш графигы үҙгәрә. Улар эш көндәрендә киске сәғәт 8-гә тиклем, ә шәмбе көнө көндөҙгө 3-кә тиклем эшләйәсәк.