КҮМЕРТАУ ИТҺЕҘ ҠАЛДЫ

Ысынлап та, ит павильоны буп-буш. Ишектә яҙыу тора (фотола). Эргәләге һатыусыларҙан, ҡасандан бирле ит һатылмай һуң, тип һорашҡайныҡ, 7 февралдән алып тинеләр. Үҙәк баҙарҙың администраторы Светлананан хәлде аңлатыуын һораныҡ. «Бына шаршамбынан алып келәймә һуғылған ит юҡ баҙарҙа. Сөнки яңы закондар буйынса, малды мал һуйыу цехында ғына һуйырға кәрәк. Ә халыҡ унда алып барырға теләмәй. Лаборатория хеҙмәткәрҙәре лә эшһеҙ ултыра. Әйҙә уларҙан һорашып киләйек», - тине. Ундағылар ҙа: «Беҙ келәймә ҡуйырға әҙербеҙ. Йорт шарттарында һуйылған малға элек силсәүит һәм ветврачтар справка бирә ине. Хәҙер улар бирмәй. Ә беҙ справкаһыҙ итте ҡабул итә алмайбыҙ», - тип хәлде аңлатты.

4-се Ивановка ауылында хужалыҡ тотҡан, эшҡыуар Александр Никульшин да телефон аша: «Ауыл халҡы малын мал һуйыу цехына алып барырға теләмәй. Прокуратураға ла яҙҙыҡ, ҡала хакимиәтенә лә барҙыҡ. Беҙҙе тыңланылар, әммә бер нимә лә әйтмәнеләр. 9 февралдә ҡала хакимиәтендә был мәсьәлә буйынса эшҡыуарҙарҙы йыйып һөйләшәсәктәр», - тине.

Покровкалағы цехҡа алып барып бер баш малды һуйыу өсөн яҡынса 2 меңдән ашыу һум аҡса кәрәк. Юл хаҡы өсөн дә түләр кәрәк. Бына шуға күрә мал хужалары әлегә иттәрен справкаһыҙ-ниһеҙ таныш-тоноштарына һатырға тырыша. Яҡшымбәт яҡтарына Ырымбур өлкәһенән ҡаҙаҡтар килеп ала, ти иттәрен. Шулай итеп, Күмертау итһеҙ ҡалды (яңы закон шулай ас итте). Артабан нимә булырын беҙ яҙып барырбыҙ.

Р. НАЗАРОВА

Автор фотолары