ХОҠУҒЫБЫҘҘАН ФАЙҘАЛАНА БЕЛӘЙЕК

Мөхтәрәм ҡәрҙәштәр, был эшкә һеҙҙең дә ҡушылыуығыҙҙы көтәбеҙ. Сөнки бөгөн барыһы ла ата-әсәләрҙең теләгенә бәйле. Сабыйҙарыбыҙҙың туған мөхиттә, башҡорт телендә тәрбиә алыуын бары һеҙ генә талап итә алаһығыҙ. Бының иң ябай юлы – балалар баҡсаһында башҡорт төркөмө асыуҙы һорап ғариза яҙыу! Рәсәй Федерацияһында «Мәғариф тураһында»ғы федераль законға ярашлы, балалар баҡсаһында башҡорт төркөмө асыу өсөн ауыл ерендә – 20, ә ҡала ерендә 25 ғариза йыйырға кәрәк.

Иң ғәзиз, һөйөклө кешебеҙҙе – сабыйыбыҙҙы балалар баҡсаһына тапшырабыҙ икән, уның өсөн баҡсала туған мөхит булдырыуҙы ла һорайыҡ. Сөнки быға хаҡыбыҙ һәм тулы хоҡуғыбыҙ бар!

Рухлы милләттәштәребеҙҙе ҡеүәтләп, Бөтә донъя башҡорттары ҡоролтайы бүләк тә әҙерләне – ғаризалар йыйып, беҙҙең ярҙам менән башҡорт төркөмөн астырыуға өлгәшкән кешегә Республика халыҡ медицинаһы һәм апитерапия үҙәгендә дауаланыуға 25 мең һумлыҡ сертификат!

Акцияға 1 апрелдә йомғаҡ яһаласаҡ.

Белешмәләр өсөн телефон: 8(347)246-32-47, 8(34761)4-20-08.