Һаман алданабыҙ

Электр иҫәпләгесен алмаштырам, тип, район буйлап кеше алдап йөрөүҙәре хаҡында яңы ғына яҙҙыҡ. Холмогорҙа берәүҙе төп башына ултыртҡандар, тинек, алмаштырырға кәрәкмәгән иҫәпләгесте алмаштырып, «изге йәндәр» шулай «ярҙам иткән» дә биш-алты меңде йомарлап кеҫәһенә тығып ҡайтып киткән. Ошоноң менән үтте бындай бәлә-ҡаза, кеше лә иҫәр түгел, алданған бәндә башҡа булмаҫ, тиһәк, бына йәнә шундай уҡ бер хәл ҡабатланған. Был юлы Яманғол ауылындағы берәүгә яңы иҫәпләгес ҡуйып киткәндәр, теге кеше, рәхмәттәрен уҡый-уҡый, быларға 7 мең һум аҡсаһын тоттороп сығарған.

Һис юғы «Юшатыр» гәзите битенән уҡып, башҡаларға шул хаҡта һөйләп аңлатығыҙ: береһе лә береһенә лә тик торғандан килеп изге эш ҡылып китмәй хәҙер. Пәйғәмбәр-әүлиәләр заманы китапта ғына ҡалды. Йорт янығыҙға сит-ят әҙәмде яҡын да юллатмағыҙ, аҡсағыҙ былай ҙа аҙ түгелме ни?