+14 °С
Облачно
Ерҙәребеҙ, һыуҙарыбыҙ
9 Августа 2021, 11:47
Тыуған яҡҡа ҡайтыу
Билдәле яҡташыбыҙ, сәсмә әҫәр яҙыу оҫтаһы Рәшит ағай Солтангәрәевтең "Тыуған яҡҡа ҡайтыу" тигән хикәйәһен, моғайын, уҡығанһығыҙҙыр. Теле шәп, унан бигерәк сюжеты шәп. Ауылда һауынсы булып эшләгән ир, оҙаҡ ҡына булмағандан һуң, тыуған яғына ҡайтып килә, ғәзиз ергә яҡынайған һайын, күңеле күтәрелә, ҡанаттары үҫә. Донъя шулай шул, тыуған ер, үҙең тәү аяҡ баҫҡан тупраҡ, бынау тауҙар, анау ҡыуаҡтар мәңге күңелдә ҡала, ҡайҙа йәшәһәң дә гел үҙенә тартып тора.
Тыуған яҡҡа ҡайтыу
Ирина Ибраһимова йыл да тыуған тупрағына ҡайтып әйләнә, Миәкә яҡтарына. Тормош һәр саҡ беҙ теләгәнсә бармай, күңелдә толҡа булмаһа, иләҫ-миләҫ саҡтарың булһа, таяныс кәрәк, Ирина Ринат ҡыҙының был йәһәттән, шөкөр, барыһы ла һәйбәт, бына ир, бына балалар, атай-инәй, бына коллегалар, Яҡшымбәт, туғандар... Шулай ҙа тыуған яҡ - тыуған яҡ инде, ҡайтып төшөү менән икенсерәккә әйләнәһең, хәс бала саҡҡа кире ҡайтҡан һымаҡ. Нарыҫтау бит ул! Уның битләүендә, сәскәле күлдәген ялпылдатып, һаман бәләкәс Ирина йүгереп китеп барған кеүек. Еләк йыйған, сөгөлдөр утаған, бесән сапҡан ерҙәр... Кистәрен усаҡ яҡҡан, таңға ҡәҙәр уйындарҙа йөрөгән (ҡайҙан килгән ул саҡлы дәрт?) урындар. Илһамы әллә күпмегә етерлек, ҡайҙа бында Кипр, Анталиялар, Миәкәгә етә буламы һуң улар?
Ғәзиз төйәгебеҙ йәшәһен, унда беҙҙе гел бала-саҡ, йәшлегебеҙ һағынып торһон. Аҙаҡ артыбыҙҙан оҙатып ҡалһын: "Йөрөгән юлдарың имен булһын, ҡыҙым, тағын ҡайт, мин һине көтәм".
