+12 °С
Дождь
Все новости
Хәтер
13 Декабря 2019, 11:55
Һеҙ мәңге иҫтәһегеҙ
Мин үҙемдең ағайым (әсәйемдең энеһе) тураһында яҙмаҡсы булам.
Мин үҙемдең ағайым (әсәйемдең энеһе) тураһында яҙмаҡсы булам.
Сабир Мөьмин улы Кинйәкәев 1919 йылдың 16 декабрендә Башҡортостандың Көйөргәҙе районы Түбәнге Мотал ауылында ярлы крәҫтиән ғаиләһендә тыуған.
Ул кесе йәштән үк бик зирәк була, хатта, мәктәпкә йөрөй башлағансы уҡырға-яҙырға өйрәнә.
Үҙенең ауылында башланғыс белемде алғандан һуң ағайым күрше Яҡуп ауылындағы крәҫтиән йәштәре мәктәбендә уҡый башлай. Ете йыллыҡ мәктәпте тамамлағас, 1936-1938 йылдарҙа Өфөлә медицина рабфагында, унан педагогия институтында уҡый, (хәҙерге Башҡорт дәүләт университеты).
Ғаилә бик мохтажлыҡ менән йәшәгәнгә күрә, ул уҡыуын ҡалдырып, Көйөргәҙенең Ермолаево район үҙәгенә, район гәзитенең мөхәррир урынбаҫары булып эшкә урынлаша. Шул йылдарҙа ижад менән шөғөлләнә, яңынан-яңы шиғырҙар, поэмалар ижад итә.
Бөйөк Ватан һуғышы сығыу менән үҙе теләп һуғышҡа китә.
Башҡортостан яҙыусылар союзы бүлмәләренең береһендә ҙур иҫтәлек таҡтаһы эленеп тора. Һуғыш фронтында фашистарға ҡаршы батырҙарса көрәшеп һәләк булған ун өс башҡорт яҙыусыһының исеме алтын хәрефтәр менән яҙып ҡуйылған унда. Шулар араһында минең ағайым Сабир Кинйәкәев та бар.
Эйе, үткән дәһшәтле һуғыш бер кемде лә аяманы. Ҡәләмдәре менән бер рәттән ҡулдарына ҡорал тотоп, дошманға ҡаршы яуға киткәндәр.
Ағайым үҙенең тәүге ҡулъяҙмалары тупланған дәфтәрен яҙыусылар союзында тикшертеп тә, һуғыш башланыу арҡаһында йыйынтығын сығарып өлгөрмәй ҡала.
Ағайым Бөйөк Ватан һуғышы осоронда ижадын тағы ла үҫтерә. Һәр ваҡыт фронттың алғы һыҙығында булыуына ҡарамаҫтан, фронтта сығарылған “Совет һуғышсыһы” газетаһына, Өфөләге “Ҡыҙыл Башҡортостан”ға, Көйөргәҙе районының “Ленин байрағы” гәзитенә үҙенең шиғырҙарын ебәреп торған.
Совет кешеләренә дошманға нәфрәттең тәрәнлеген, һуғышсыға халыҡтың һәм Ватандың йөкләмәләрен күрһәтеп, былай тип яҙған:
“Һәр бер пуля бөгөн йөрәктәрҙең
Эҫеһе менән иреп ҡойола
Һәр пуляны Ватан изге өмөт,
Ышаныс менән бирә улына”.
Уның “Берәй килер инең үҙең дә” һ. б. шиғырҙары һуғышсыһының самими хистәрен бик асыҡ һүрәтләйҙәр, фронт һәм тыл берҙәмлеге тураһында йырлайҙар.
Ағайым фронтта политрук булып 1944 йылдың 18 декабренә тиклем батырҙарса һуғыша. Тик фашист пуляһынан үлемесле яралана.
Балкан ярымутрауында Венгрияның Капошвар ҡалаһынан 22 саҡрым алыҫлыҡта ятҡан Чикота утары янында үлә һәм ерләнә.
Нәйлә ЙОСОПОВА
Өфө ҡалаһы
Сабир Кинйәкәй
Берәй килер инең үҙең дә
Баҡсалағы гөлдәр тирбәлешеп,
Ҡаршы алған кеүек таң нурын,
Һәр хатыңды оло һағыныу менән
Көтөп ҡаршы алам аҡыллым.
Беҙҙең данлы, ауыр фронт юлы
Балҡан түбәләренә ауыша...
Һинең хатың йә ял, йә походта,
Йә һуғышта килеп ҡушыла.
Хаттарыңда ҡараштарыңды ла,
Йылмайыуыңды ла һалаһың...
Ә үҙең унда, бик-бик алыҫта,
Күңелем күген биләп ҡалаһың.
Ҡарлуғастың ҡыйғас ҡанатындай,
Кескәй конвертыңдың эсендә
Гөлдәр кеүек аңҡып, айҙай балҡып,
Берәй килер инең үҙең дә.
1944 йыл
Ғорурлан илем
Дошман ҡаса, ҡанға буяп
Әшәке эҙен,
Европа буйлап атлай
Улдарың һинең,
Ғорурлан, илем!
Гүзәл, ирекле тормошоң,
Намыҫың өсөн
Уттарҙы, һыуҙарҙы үтте
Улдарың һинең,
Ғорурлан, илем!
Тапап йыртҡыс фашистарҙы
Яуызлыҡ көсөн,
Сталинградты данға төрҙө
Улдарың һинең,
Ғорурлан, илем!
Ҡара диңгеҙ, Дон, Днепр
Һәм Днестрҙың
Азатлығын яулап уҙҙы
Улдарың һинең,
Ғорурлан, илем!
Карпат тауҙары ҡабатлай
Батырҙар исемен,
Легендар еңеүсе булды
Улдарың һинең,
Ғорурлан, илем!
1944 йыл.
Сәскә
(иптәш ҡыҙ иҫтәлегенә)
Сәскә өҙҙөм иҫтәлеккә,
Төҫө итеп бергә йөрөүҙең.
Ҡаҙаманым, ләкин түшкә,
Йөрәгемдә сөнки һин үҙең.
Сәскә һулыр иртәгә үк,
Йәмһеҙләнеү инер төҫөнә.
Һин йәшәрһең йәнем кеүек,
Ҡыҫҡан ҡулың, үпкән битең дә.
1942 йыл
Читайте нас:
© 2024 Юшатыр
Свидетельство о регистрации СМИ: ПИ ФС 02 - 01456 от 14.09.2015 г. выдано Управлением федеральной службы по надзору в сфере связи, информационных технологий и массовых коммуникаций по Республике Башкортостан Государственное унитарное предприятие Республики Башкортостан Издательский дом «Республика Башкортостан»
Баш мөхәррир М.М.Ильясов
Эл. почта
Адрес
Республика Башкортостан, г. Кумертау, ул. Комсомольская, д. 35
Редакция
8 (34761) 4-44-45