Осрашыу

Былай әйтеү, ысынында, артыҡ ине, һине тәрбиәләгән кеше (икенсе әсәй тиһәң дә була) үҙенең 90 йәшен (!) ҡаршы ала, ә һин шунда ла бармай ят. 
Фәүзиә Маннан ҡыҙы Аҡҡолова бар ғүмерен балаларҙы тәрбиәләүгә, уҡытыуға бағышлаған кеше, математик ул, әммә ҡоро, хисһеҙ һандар менән генә эш итмәне ул, шәхес масштабы үтә киң ине - әҙәбиәт, тарих тиһәң, уға еткәне һирәк булды. Ишембай интернат-мәктәбендә уҡытты, тәрбиәсе лә булды, быныһы беҙ белгәне, ә белмәгәне....
Фәүзиә апай ошо көнгәсә һаман булһа сафта икән, китаптар яҙа, йәмәғәт эшендә ҡатнаша. Уны ике яҡтан тотоп ҡына йөрөтәләр, йәш, барыбер, үҙен белдерә. Быныһы тән тураһында, ә йәне, ә мейеһе! Беҙ хәтерләмәгәнде иҫендә йөрөтә. Ғәжәп!
Тәрбиәсебеҙҙе ҡотларға тип, 1994 йылда гимназияны бөткән беҙ өсәү килдек, мин, ике Гөлназ. Ҡотлағанда Фәүзиә апайыбыҙ йылмая биреп ултырҙы ла һүҙ ҡыҫтырҙы: һин өйгә эштәреңде тиҙ генә эшләп бөтә инең дә, парта аҫтына инеп, китаптар уҡый ҙа ултыра торғайның (самоподготовка тиҙәр ине уны, беҙ өй эштәрен башҡарабыҙ, ә Фәүзиә апай беҙҙе ҡараулап ултыра, кәрәкһә, ярҙам итә, бик тыңламаһаң, әрләй).
Самоподготовка тигәндән. Ике сәғәт самаһы ваҡыт ултырырға кәрәк, биштән етегә тиклем, кемеһе өлгөрә, кемеһе юҡ тигәндәй, әммә барыһы ла интернатҡа ашыға - ужин. Йәнә бер сәбәп бар - "Рабыня Изаура" башлана. Ә Фәүзиә Маннан ҡыҙы ҡайтарып ебәрергә ашыҡмай, һәр береһен тикшереп кенә сикләнһә ни асыу, тота ла берәй темаға дәрес башлай ҙа ебәрә. Ҡараның "Рабыняны", ҡарамай, үҙең бында раб булып ултыраһың.
....Уҫал булды ул. Барыһы ла ҡурҡты. Аҡыллы уҫал булды. Гел, баҫтырып, әрләгән дә йөрөгән кеше түгел, ҡорораҡ булһа ла, маҡтарға, дәртләндерергә лә оҫта ине. Беҙҙең менән сәғәттәр буйы төрлө темаға һөйләшә ине, тағы ла бер яғы: әҙәбиәт, тарих өлкәһенә ылыҡтырырға тырышты - "Һин ошо китапты уҡыныңмы, юҡ? Мә, уҡы ла, кире ҡайтар".