ОТТОҠ ҠЫНА

Көйөргәҙе районының Мораптал ауылында йәшәүсе, Баязит Бикбай исемендәге премия лауреаты Сулпан Миңлебаева һәм Күмертау ҡалаһынан шағир Хәмзә Ишдәүләтов саҡырылды. Осрашыуҙы «репортер»ҙар, 10-сы класс уҡыусылары Вилмир Атнағолов һәм Айгизә Боҫҡанова алып барҙы. Әҙиптәр шиғырҙарын ғына уҡып ҡалманы, шиғыр яҙыу, хәҙерге әҙәби тормош тураһында ла һөйләне. Сараға шулай уҡ ҡасандыр лицейҙа уҡып, хәҙер башҡа уҡыу йорттарында белем алыусы «Арғымаҡ» түңәрәге ағзалары ла килгән ине. Күмертау педагогия колледжында уҡып йөрөүсе Зарима Оморҙаҡова, тыумышы менән Ейәнсура районы (псевдонимы Ҡарлуғас), 11-се класс уҡыусылары Байрас Аҡсурин, Илфир Хәмиҙуллин, 9-сы класс уҡыусыһы Фәнзилә Әхмәтова үҙҙәренең ижад емештәре менән уртаҡлашты. Уларҙың шиғырҙары барыһына ла бик оҡшаны. Лицей президенты Иҙел Дәүләтбаев Сулпан апаларына бик сетерекле һорау биргән ине. Ул тел мәсьәләһенә ҡағыла. «Башҡортса һөйләшеп кенә башҡорт милләтен һаҡлап ҡалып буламы?» - тигән һорауына Сулпан апалары бик ентекле яуап ҡайтарҙы.

«Арғымаҡ» әҙәби түңәрәге етәксеһе Азат Хәлилов ағай уҡыу йортондағы әҙәби түңәрәк тураһында һөйләне. Ҡунаҡтарға түңәрәк ағзалары тарафынан сығарылған йыйынтыҡ та бүләк ителде.

Бындай әҙәби осрашыуҙарҙы артабан да дауам итергә кәрәк, тип уйлайым. Сөнки ижади аралашыу ҡәләмеңде шымартыуҙа күп ижад серҙәренә төшөнөргә ярҙам итә, тел нескәлектәренә өйрәтә. Был саранан беҙ оттоҡ ҡына.