КҮҘҘӘРЕНДӘ БАЛҠЫЙ ОСҠОНДАР

Үткән йәкшәмбе көндө Күмертауҙың балалар ижады үҙәгендә фитнес-аэробика һәм чир спорт буйынса ярыш үтте. Был бәйгелә районыбыҙҙың Зәк-Ишмәт ауылы уҡыусылары ла көс һынашты.

Татьяна Исҡужина етәкселегендәге “Калейдоскоп” тип аталған командалағы ҡыҙҙар аэробика буйынса сығыш яһаны. Унда 2-се класс уҡыусылары Әлфизә Зәйнәғәбдинова, Василиса Малышева, Ләйсән Йәлилова, 4-се класс уҡыусылары Яна Гурьянова, Роксана Усманова, Камилла Ғөбәйҙуллина, Снежанна Капустина, Софья Фошина һәм Таймаҫ гимназияһының 3-сө класс уҡыусыһы булған үҙенең ҡыҙы Аня Исҡужина бик матур сығыш яһанылар.

- Был бәйгенән беҙ үҙебеҙ өсөн күп нәмә алдыҡ. Башҡаларҙы күрҙек, үҙебеҙҙе лә күрһәттек. Беҙгә ярышта ҡатнашыу мөмкинлеге тыуҙырған етәксебеҙ Татьяна Исҡужинаға ҙур рәхмәт. Ул беҙҙе бейеү, аэробика серҙәренә өйрәтә, - тиҙәр Зәк-Ишмәт ауылы уҡыусылары, ҡыуанып.

Ҡыҙҙарҙың тырышлығы бушҡа булманы, улар үҙ йәштәре категорияһы буйынса 2-се урынды, ә командалар араһында 3-сө урын яуланылар.

- Был конкурста Күмертау ныҡ йылы ҡаршы алды. Үҙҙәренән сығыш яһаусылар күп булды, ә ситтән мәләүездәр ҙә һәм беҙ генә инек. Бәйгелә иң мөһиме ауыл балаларын алып барып башҡаларҙың сығыштарын күрһәтеүҙе маҡсат итеп ҡуйғайным. Улар ҙа башҡа балалар кеүек үк төрлө сараларҙа ҡатнаша, еңеү яулай алыуҙарын аңлаһындар, күрһендәр, тип уйланым. Балаларға ныҡ оҡшаны, һәр сығышты иғтибар менән ҡаранылар, хатта күҙҙәрендә осҡондар ҙа балҡыны. Ҡыуанышып, дәртләнешеп ҡайтты ҡыҙҙар. Был уларҙың хәтерҙәрендә ғүмерлеккә яҡты уй булып һаҡланасаҡ. Ҡыҙҙарымдың шатлыҡтарын күреп үҙем дә ныҡ йыуандым.

Мин Зәк-Ишмәт мәктәбендә инглиз телен уҡытыуҙан башҡа, аҙнаһына ике тапҡыр бейеү түңәрәген дә алып барам. Был аҙыраҡ, әлбиттә, шулай ҙа бәйгегә балалар менән тырышып әҙерләндек.

Күмертауға барып, ошо сарала ҡатнашыуыбыҙҙы хуплап тороусы Зәк-Ишмәт мәктәбе директоры урынбаҫары Рәмзиә Зәйнәғәбдиноваға, башҡа уҡытыусыларға, ата-әсәләргә, сараны юғары кимәлдә ойоштороусы Гүзәл Ғәзизоваға, Станислав Суворовҡа, балалар ижады үҙәге Алексей Докукинға рәхмәттәремде еткерәм, - ти “Калейдоскоп” төркөмө етәксеһе Татьяна Исҡужина.

Февралдә Күмертауҙа фитнес-аэробика һәм чир спорт буйынса республика фестивале лә буласаҡ. Һәр ергә лә өлгөр, тырыш Татьяна Исҡужина шунда ла “Калейдоскоп” менән ҡатнашасаҡбыҙ, тип дәртләнеп йөрөй. Уларҙың еңеренә беҙ ышанабыҙ.