БАШҠОРТОСТАН ИСЕМЕНӘН ҠАТНАШАЛАР

Уҡыусы йәштәрҙең фестивале Ҡара диңгеҙ буйындағы «Смена» Бөтә Рәсәй балалар үҙәгендә 9-сы тапҡыр старт алды. Был сараның маҡсаты — йәштәр мөхитендә мәҙәниәт-ара бәйләнеште үҫтереү. Рәсәйҙең 40 төбәгенән килгән 40 команда бында ике аҙна буйы бер-береһе менән аралашып, төрлө ҡыҙыҡлы шәхестәр менән осрашып, әңгәмәләшеп, милләт-ара һәм мәҙәниәт-ара бәйләнештәрҙе нығытыу эштәрен башҡарасаҡ.

16 майҙа фестивалде асыу тантанаһында ҡатнашыусы РФ Дәүләт думаһы комитетының милләттәр эше буйынса рәйесе, РФ Президенты эргәһендәге милләт-ара бәйләнештәр буйынса Советы ағзаһы Илдар Ғилметдинов та үҙ сығышында: «Милләт-ара килешеү — беҙҙең илдә иң мөһим мәсьәләләрҙең береһе булып тора. Йәш быуындың бер-береһен традициялар һәм мәҙәниәт аша таныуы бигерәк тә яҡшы. Ошоноң кеүек фестивалдәр Рәсәйҙә етешмәй. Смена аҙағына егеттәр һәм ҡыҙҙар бөтмәҫ-төкәнмәҫ тәьҫораттар ғына алып ҡайтмаясаҡ. Улар шулай уҡ артабан да бер-береһе менән аралашып, дуҫлашып, ярҙамлашып йәшәйәсәк» - ти.