БЕҘҘЕКЕЛӘР ҘӘ ҺЫНАТМАЙ

9-11 ғинуар көндәрендә Өфөлә, Р. Ғарипов исемендәге республика гимназия-интернатында 8-11-се класс уҡыусылары араһында туған (башҡорт) теле һәм әҙәбиәте буйынса төбәк-ара һәм Башҡортостан Республикаһының дәүләт теле булараҡ башҡорт теле буйынса республика олимпиадаһы үтте.

Бында Ҡурған, Силәбе, Ырымбур өлкәләренән һәм Башҡортостандан 300-ҙән ашыу уҡыусы ҡатнашты. Улар араһында Ермолаевоның 1-се һанлы мәктәбенең 9Б класы уҡыусыһы Ринат Келов төбәк-ара олимпиадаһында призлы урын алыуға өлгәште. Уның етәксеһе — Резида Рәғип ҡыҙы Иҙрисова, башҡорт теле һәм әҙәбиәте уҡытыусыһы.

Шулай уҡ 10-11 ғинуарҙа Ҡ. Дәүләткилдеев исемендәге республика һынлы сәнғәт гимназия-интернаты базаһында туған (татар, мари, сыуаш, удмурт) телдәр буйынса 8-11-се класс уҡыусылары араһында республика олимпиадаһы уҙғарылды.

Олимпиада эштәренең һөҙөмтәләре буйынса район уҡыусылары призлы урындар алыуға өлгәште. Яңы Мораптал мәктәбенең 8-се класс уҡыусыһы Илүзә Ғәлиева (етәксеһе Эльфира Кәрим ҡыҙы Вәлиева, татар теле һәм әҙәбиәте уҡытыусыһы) туған татар теленән призлы урын алды. Көйөргәҙе районында сыуаш теле лә өйрәнелә. Әммә ошоға тиклем олимпиадала сыуаш теле буйынса уҡыусылар призлы урындарға сыҡҡандары юҡ ине. Беҙҙең районға тәүге еңеүҙе Павловка мәктәбенең 10-сы класс уҡыусыһы Андрей Егоров алып ҡайтты. Уның етәксеһе — сыуаш теле һәм әҙәбиәте уҡытыусыһы Галина Анатольевна Егорова.

Уҡыусыларҙы ысын күңелдән еңеүҙәре менән ҡотлайбыҙ, алдағы тормоштарында уңыштар, тағы ла ҙурыраҡ үрҙәр яулауҙарын теләйбеҙ.