Министрҙарҙан кәм түгелдәр

Ил башлығы йәки министр рангыһындағы ҙур кешеләрҙе көн дә телевизорҙан күрһәтәләр: тегендә барып кем менәндер ҡул ҡыҫышалар, бында килеп кемдәр менәндер килешеүҙәр төҙөйҙәр. Татарстан егеттәрен һуштан яҙҙырып йөрөгән Көйөргәҙе ҡыҙҙары ла министрҙарҙан кәм түгелдәр, был аҙнала улар күрше республикала Высокогорский районының мәғариф бүлеге менән килешеү төҙөнө. Римма Ғөбәйҙуллина, Ирина Ибраһимова, Ләйсән Аҙнабаевалар шулайтып эшлекле сәфәрҙә гөр килеп йөрөп ҡайтты. Район башлығы Рөстәм Кәлимуллиндың кабинетында рәхәтләнеп сәй эскәндәр, башлыҡҡа Бөрйән, Ҡыпсаҡ ырыуҙары хаҡындағы китаптарҙы бүләк иткәндәр.

Күрше республикаға нисек барып ҡайтыуҙары тураһында Ирина Ибраһимова тәьҫораттары менән бүлеште.

- Мәктәп, балалар баҡсаһында булдыҡ, уларҙа бәләкәйҙән үк спортҡа ныҡ акцент бирелә икәнлеге күренеп тора. Хатта балалар баҡсаһында ла хоккей ҡумтаһы, яһалма боҙҙары бар.

Экскурсиянан һуң конференцияға киттек. Ярты конференция татарса үтте. Беҙ, ғәжәпләнеп: « Бында бит рус кешеләре лә бар бит» - тиеүебеҙгә, «Улар беҙҙе аңлайҙар ул», - тинеләр. Шулай телде һаҡлап ҡалыу өсөн бик тырышып яталар.

Ҡунаҡсыллыҡтары ла бик оҡшаны, беҙ ҙә уларҙы үҙебеҙгә саҡырҙыҡ. Ырымбур өлкәһе кеүек Татарстан Республикаһы менән дә бергә дуҫ булып, аралашып йәшәргә һөйләштек.