Хикмәткә ишек асҡан

Аллаға шөкөр, был хикмәт беҙҙең районда ныҡ үҫешкән. Нимә-нимә, бейеүҙе беҙ оҫта башҡарабыҙ. Һәр кем ҡулынан (аяғынан) килгәнсә бейей, кемдер ҡунаҡта ғына тыпырлауҙан ары уҙа алмаһа, районда ысын артист бейеүселәр ҙә байтаҡ.

Хоеографияла аҙ ғына булһа ла һупалаған кеше, беҙҙең артистарҙың сығышын ҡарау менән әйтә ала: быныһы Яҡшымбәт мәктәбе, быныһы Яҡут, ә быныһы Морапталдыҡы.

Май байрамдары алдынан Бейеү көнөнә арнап, район үҙәгендә ҙур гала-концерт булды- иҙәндәрең генә түҙһен.

Йылдар буйы сәнғәттең был төрөнә өлөш кереткәндәрҙе бүләкләнеләр, рәхмәт әйттеләр. Шунһыҙ булмай, Рәмзиә Әбйәлилова менән Гөлшат Хәйбуллинаны ғына алығыҙ, уларҙың оло тормошҡа сығарған уҡыусылары һанап бөткөһөҙ. Барыһы ла ҙур сәхнәләрҙе иңләмәй, тик бейеү бит ул - сәнғәт, йәшәү рәүеше, уҡытыусылары, тимәк, уларҙың күңелендә матурлыҡ тәрбиәләгән, тылсымға ишек асҡан.