ЭШКӘ ДӘРТЛӘНДЕРҘЕЛӘР

Ошондай уңған ялан батырҙарыбыҙҙың саҡ ҡына булһа ла күңелдәренә дәрт, илһам өҫтәп китеү ниәте менән “Йәшлек” район мәҙәниәт һарайының артистары баҫыуҙарға концерт менән сығыш яһарға сыҡтылар. Ошо көндәрҙә улар Бахмут ауылы биләмәһендәге “А7 Агро — БР” һәм Киров исемендәге хужалыҡтарҙың хеҙмәткәрҙәренә үҙҙәренең йыр-моңдарын бүләк итте. Төшкө аш ваҡытында тырыш ағайҙар, апайҙар Венера Усманова, Вера Уйманова, Геннадий Попов, Николай Шашкин һәм шулай уҡ мин башҡарған йырҙарҙы тыңлап, Рәсимә Ғайсинаның бейеүҙәрен ҡарап, Евгений Савиндың үҙе яҙған шиғырын ишетеп ҡыуандылар. Игенселәребеҙ: “Икмәк булһа – йыр ҙа булыр”,- тип, үҙҙәренең дә йыр-моңға, иғтибарға һыуһауҙарын белдерҙеләр.

Алып барыусылар хөрмәтле уңғандарыбыҙға яландарҙа эштәренең гөрләп тороуын, күк йөҙөбөҙҙөң һәр саҡ аяҙ булыуын, һаулыҡ, бәхет теләп хушлашты.