«СЕР АСЫЛДЫ»

Кисәне асып, Закир Әкбәров: «Уйланыу һәм фекер алышыуға ҡоролған был осрашыуға әҫәрҙе уҡып сыҡҡан кешеләр саҡырылды. Роман тураһында төрлө кешенән төрлө фекер ишетергә тура килде. Бөгөн мин үҙемде борсоған бер һорауға яуап табырға килдем: «Әҙәби әҫәр тыуҙыра алғанмынмы, юҡмы?», - тигән һорау ҡуйҙы.

Күмертау яҙыусылар ойошмаһы рәйесе Рима Арыҫланова: «Был әҫәр - татар әҙәбиәтендәге яңы аҙым. Романға тотоноп, уның һуңғы нөктәһен ҡуйғандар бик аҙ. Минең ҡарашҡа, бик бай телле, тотош бер быуын вәкилдәре тормошон сағылдырған, ғаилә ҡиммәттәрен яҡтыртҡан автобиографик әҫәр», - тине. 3-сө БРГИ-ның башҡорт теле һәм әҙәбиәте уҡытыусыһы Руша Солтанғолова: «Ике тапҡыр уҡып сыҡтым. Әхлаҡ темаһы күтәрелеүе бик оҡшаны. Иҫ киткес, бөгөнгө көндә бик кәрәкле, уҡымлы китап. Балалар тормошонан алып, өлкән быуын кешеләре тормошона тиклемге ваҡиғалар һүрәтләнгән», - тигән һүҙҙәрен еткерҙе. Яҙыусының тормош иптәше Рәсимә апай ҙа: «Миңә, әҙәбиәт уҡытыусыһы булараҡ, әҫәрҙең композицияһы оҡшаны. Әхлаҡлы, тәртипле роман. Ғаиләгә ҡарата яҡшы мөнәсәбәт күренә», - тигән фекерҙәрен әйтте. Кинйәғәли Абдуллин да романдың темаһының киң булыуын билдәләп: «Почтальон малайы» повесының дауамы, тип әйтергә лә була. Тормош дауам итә, был романдың да икенсе китабы булыр әле, тип ышанам», - тине. Осрашыуҙағы һәр кем был романдың уңышлы булыуын әйтте. Күмертау ҡалаһы мәҙәниәт идаралығы директоры Светлана Тураева ла: «Романды бер тынала уҡып сыҡтым. Хатта, үҙемдең студент йылдарына ҡайтып килгәндәй булдым. Әҫәрҙә беҙгә бик күп таныш булған кешеләрҙең образдары сағылған. Һеҙгә ҙур рәхмәт!», - тип ҡыҙыл рауза сәскәләрен бүләк итте. Шәбағыш мәктәбенең татар теле һәм әҙәбиәте уҡытыусыһы Илшат Нәжмиев: «Закир Әкбәров минең өсөн үҙе бер сер була торғайны. Ошо китапты уҡып сығыу, был ҙур серҙе асты», - тигән һүҙҙәрен еткерҙе. Был йылы осрашыуҙа Закир Әкбәровтың үҙен бик ныҡ борсоған «Әҙәби әҫәр тыуҙыра алғанмынмы?» тигән һорауына ыңғай яуап яңғыраны.