ҮҘЕНСӘЛЕКЛЕ КҮРГӘҘМӘ

Балалар ижады үҙәгендә бик үҙенсәлекле күргәҙмә эшләй башланы. Унда 10 йәшлек кенә Айрат Хәйруллиндың ижади эштәре тупланған.

Ҡаланың 3-сө һанлы мәктәбенең 4-се класс уҡыусыһы Айрат Хәйруллин Балалар ижады үҙәгендәге «Антураж» креатив-студияһында (уҡытыусыһы С.С. Мельникова) дүртенсе йыл шөғөлләнә. Ошо йылдар эсендә Айрат бик күп нәмәгә өйрәнә һәм арыу ғына үҙенең картиналарын да яҙып өлгөрә. Бөтә Рәсәй һәм Халыҡ-ара конкурстарҙа ла бер нисә тапҡыр еңеү яулай ул. «Үҙең өсөн генә ижад итеү ҡыҙыҡ түгел, ижадыңды башҡаларға ла күрһәтергә һәм шатлығың менән бүлешергә кәрәк», - ти Айрат. Әгәр һеҙ ҙә 10 йәшлек кенә талант эйәһенең ошо ижади ҡыуанысы менән бүлешкегеҙ килһә, тиҙерәк Балалар ижады үҙәгенең 1-се ҡатындағы фойела урынлашҡан күргәҙмәгә ашығығыҙ! Ә Айрат Хәйруллиндың тағы ла юғары һөнәри үрҙәргә күтәрелеп, үҙенең ижади емештәре менән эрерәк ҡалаларҙы яулап алырына ышанабыҙ һәм уға ҙур уңыштар теләйбеҙ.