Милли батырыбыҙға арнап

Башҡорт халҡының милли батыры – Салауат Юлаевтың тыуыуына 270 йыл тулыуға арнап Әхмәт-Зәки Вәлиди исемендәге Милли китапхана библиографик күрһәткес баҫтырып сығарҙы.

Салауат Юлаев – Рәсәйҙең сағыу тарихи фигураларының береһе, башҡорт милли геройы, шағир-импровизатор, яугир-полководец. Уның исеме Е. И. Пугачев етәкселегендәге Крәҫтиәндәр һуғышы (1773–1775) йылъяҙмаһында билдәле урын биләй. Салауат образы башҡорт халҡының ҡаһарманлығын һәм азатлыҡ һөйөүен генә түгел, ә Рәсәй халыҡтары дуҫлығын, ғәҙеллек өсөн бергәләп көрәшеүҙәрен дә сағылдыра. Халҡыбыҙҙың бөйөк улы ил тарихында һәм мәҙәниәтендә ҙур эҙ ҡалдырҙы.
Тәҡдим ителгән биобиблиографик күрһәткес Салауат Юлаевтың 270 йыллығына арнап төҙөлдө. Хеҙмәт Милли китапхана фонды һәм белешмә-библиографик аппараты нигеҙендә әҙерләнде. Белешмә өҫтөндә эшләү барышында Рәсәй китап палатаһы йылъяҙмалары (Китап йылъяҙмаһы, Журнал мәҡәләләре йылъяҙмаһы, Гәзит мәҡәләләре йылъяҙмаһы), Башҡортостан Республикаһы матбуғаты йылъяҙмаларына ла иғтибар ителде. Башҡорт, рус, татар һәм башҡа телдәрҙә сыҡҡан китаптар, йыйынтыҡтар, гәзит-журналдарҙан мәҡәләләр индерелде. Ҡаҙаҡ, эстон һәм башҡа телдәрҙәге сығанаҡтар рус телендә һәм йәйәләр эсендә төп нөсхә телен күрһәтеп бирелде.
Ҡулланмаға 1847 йылдан 2024 йылға тиклемге осорҙағы баҫмалар исемлеге индерелде һәм материалдарҙы һайлап алыу 2024 йылдың июлендә тамамланды.
Ҡулланма ғилми хеҙмәткәрҙәргә, тыуған яҡты өйрәнеүселәргә, тарихсыларға, нәшриәт хеҙмәткәрҙәренә һәм киң мәғлүмәт саралары хеҙмәткәрҙәренә, китапханасыларға, студенттарға һәм уҡыусыларға, ғөмүмән, Башҡортостан тарихы һәм мәҙәниәте менән ҡыҙыҡһынғаныусыларға тәҡдим ителә.

Автор: Илүзә Вахитова-Хөсәйенова