+13 °С
Ясна
Район хакимиәтендә
7 Июнь 2021, 07:16
Диссонанс
Бик тә эшең булмаһа, күсен дә йөрө тигән кеүек, район хакимиәте йәнә хәрәкәткә килде.
Бик тә эшең булмаһа, күсен дә йөрө тигән кеүек, район хакимиәте йәнә хәрәкәткә килде. Иҡтисад бүлеге кире икенсе ҡатҡа төштө, бухгалтерия ҡайта, "Берҙәм Рәсәй" бына-бына почта бинаһына күсенергә тора. ЗАГС та тиҙҙән өй туйлаясаҡ - уны "Йәшлек" мәҙәниәт һарайына күсерәләр.
Артистар менән бергә ултыра булып сыға, күңелле була, тимәк. ЗАГС-тан кеше аяғы өҙөлмәй, бына уларға ҡыйын буламаҫмы? Үлем тураһында ҡағыҙ алырға килдең, ә бында "Ашыҡма китергә" тип йәки "Ас күҙеңде, китмә ҡалдырып" йырлайҙар. Ике йәш ҡайнар йөрәк килеп керә, ул минһеҙ, мин унһыҙ йәшәй алмайбыҙ, ҡауыштырығыҙ. Ҡолаҡҡа йыр бәрелә: "Һине наҙлап, һине һөйөүҙәрем никахыма бит ул хыянат". Бөттө, ошонан башлап ҡыҙҙың-егеттең саф күңеленә шик төшә: донъя хәлен белеп булмай, ҡайҙа ҡарама уйнаш, әллә кемде наҙлар әле был, балдағым бар тип тормаҫ.
Кемдәрҙер, бер-береһенә ҡағылыу түгел, ҡарамаҫҡа ла тырышып, килә: бүтән түҙеп йәшәр әмәл ҡалманы, бер минут та һуҙмай, айырығыҙ беҙҙе! Ә был ваҡытта күрше бүлмәнән "Мин һине ташламам мәңгегә-мәңгегә" тип кемдер рәхәтләнеп һуҙа. Диссонанс. Бер нимәгә лә аптырарлығы ла ҡалманы, буғай, һуңғы мәл, ниңәлер, гармонияның беҙҙе онотоп торған мәле.
