Бер сессия, ике кандидат, бер башлыҡ

Өс кеше дәғүә итә ине, хәтерегеҙҙә булһа, Юлай Ильясов үҙе, урынбаҫары Данил Акилов һәм Галина Майорова - ауыл башлығы. Бөгөн ике генә кешенең кандидатураһын ҡаранылар, Галина Владимировна Өфөгә комиссия ҡаршыһына бармай ҡалған, юҡты бушҡа ауҙарып йөрөмәйем тинеме икән, әллә башҡа сәбәбе булды, ҡыҫҡаһы, районды етәкләргә уға яҙмаған. Алты кешенән торған комиссия кандидаттарҙың белемен тикшергән, Конституцияны беләме, Президент указдарын өйрәнгәнме, комиссиялағы алты кешенең өсәүһе беҙҙекеләр - Ә. Исламғолов, А. Самсоненко һәм Э. Васильева. Ике кандидат өсөн тауыш бирер алдынан Дамир Байгилдин һорау бирҙе: Юлай Талхович, районды артабан да етәкләр булһағыҙ, пландарығыҙ ниндәй? Исем өсөн булһа ла, икенсе кандидаттан да белештеләр: башлыҡ булып китһәгеҙ, һеҙ нимә эшләйһегеҙ?

Сессияға республика башлығы аппаратынан да килгәндәр - бик мөһим ваҡиға ла. В. Кургузов, йәмәғәт хәүефһеҙлеге ведомоство-ара Советы етәксеһе урынбаҫары, Данил Зиннәт улының да, Юлай Талха улының да биографияһын оҙаҡ итеп тәфсирләп уҡып ишеттерҙе. Район депутаттары уларҙы диҡҡәт менән тыңлап бөткәс, тауышҡа ҡуйылды.

Интрига килеп сыҡманы, Данил Зиннәт улы өсөн ҡул күтәртеп тә торманылар - Юлай Ильясов бер тауыштан киләһе 4 йылға башлыҡ булып һайланды.

Ныҡ тәьҫирләнгән Ю. Ильясов трибуна артына үтте:

- Ике йыл эшләү дәүерендә мин ныҡ үҙгәрҙем, - тулҡынланыуы һиҙелде, - тормошто нығыраҡ аңлай башланым. Хаталар булманы түгел, булды....
Тышҡа сығыу менән шаптырҙатып ямғыр яуа башланы, быйыл үтә ҡәҙерле ул беҙгә, яуһын. Хәйерлегә була ул.

Тулы материал киләһе һанда була.