Беҙҙә байрам, беҙҙә туй…

12 июндә өс байрам бергә тура килде. Ул, беренсенән, Рәсәй көнө, икенсенән - Фәнир менән Тамара Малбаевтарҙың алтын туйы һәм һабаҡташтарҙың осрашыу кисәһе ине. Маяҡ ҡасабаһындағы интернат-мәктәпте тамамлауыбыҙға 53 йыл булып китте. Түңәрәк датаға тура килмәһә лә, алдан һөйләшелгәнсә, июнь айының икенсе аҙнаһында, осрашыуға йыйылдыҡ.

Был осрашыуға быйыл Малбаевтарҙың әкиәт донъяһындай йортона килдек. Тамара менән Фәнир икеһе лә бер синыфта уҡыны, Фәнир беҙҙең синыфтың иң матур йырсыһы, бейеүсеһе, оҫта гармунсыһы булды, ә Тамара ҡыҙыҡтырғыс һылыулығы, башҡорт ҡатын-ҡыҙҙарына хас булмаған буталсыҡ гүзәллеге: оҙон етен толомдар, түңәрәк айҙай ап-аҡ йөҙ, зәңгәр күҙҙәре менән арбай ине. Шиғыр уҡыһа, барыбыҙ ҙа таң ҡалып тыңлай инек. Аллаһы Тәғәлә уларға барыһын да йәлләмәй биргән: аҡылын да, талантын да, тырышлығын да. 10-сы класты тамамлағас, Стәрлетамаҡ мәҙәни ағартыу мәктәбенә уҡырға керҙеләр. Уны уҡып бөтөүгә Фәнирҙе армияға алалар. Йәштәр бер-береһенә көн дә хат яҙып торорға вәғәҙә биреп айырылышалар һәм һүҙҙәрендә торалар. Һөйгәненән алған бер сумаҙан хатты күтәреп, хеҙмәтен тамамлап ҡайтыу менән матур туй яһайҙар. Үҙҙәренең саф мөхәббәттәрен 50 йыл һаҡлап, һоҡланырлыҡ тормош ҡороп йәшәйҙәр. Үҙебеҙҙең Көйөргәҙе районында абруйға ҡаҙанған шәхестәр улар. Ниндәй генә эштә эшләһәләр ҙә, тырыш хеҙмәттәре менән халыҡ һөйөүен яулайҙар. Өс ҡыҙ үҫтереп, уларҙың балаларын ҡарашып, хаҡлы ялда булыуҙарына ҡарамаҫтан, һаман да халыҡҡа хеҙмәт итәләр. Тамарабыҙ - Көйөргәҙе районының төп Ағинәйе, Фәнир ҙә йәмәғәтселек эштәрендә әүҙем ҡатнаша.

Әлегә тиклем ошо осрашыуҙарҙы ойоштороусы ир-егеттәребеҙ - Фәнир Малбаев, Ишмөхәмәт Хисамов, Рамаҙан Ибраһимов булды. Улар мәктәптә уҡығанда ла беҙҙең кластың иң булдыҡлы егеттәре ине, халыҡ мәҡәле дөрөҫ әйтә - булыр бала бишектән, тип.

Рамаҙан полковник дәрәжәһенә етеп, әле хаҡлы ялда, уның да үҙе яратҡан шөғөлө бар - һүҙлектәр төҙөй. Ул һәр ваҡыт тыныс, етди, ихлас, тәүәккәл, ғәҙел, илем, халҡым, тип йәшәгән кеше. Рамаҙаныбыҙ Фәнир менән Тамараны алтын туйҙары менән шул тиклем матур итеп ҡотланы, Фәнирҙең тап ошондай күренекле кеше булыры бәләкәй сағынан беленә ине, тип әйтте ул. Һәр беребеҙ, инде сал сәсле 70-те уҙған класташтар, тормошҡа байҡау яһап, матур ҡотлауҙар әйттек.

Бөтә республикаға билдәле класташыбыҙ, күренекле шәхес - Салауат Юлаев исемендәге дәүләт премияһы лауреаты, Башҡортостан Республикаһының атҡаҙанған мәҙәниәт хеҙмәткәре, халыҡ-ара төрки академия академигы, тарихсы-яҙыусы Ғәлим Хисамов. Уның яҙған һәр тарихи әҫәрен уҡып барабыҙ, шундай класташыбыҙ булыу менән ғорурланабыҙ.

Ишмөхәмәт Хисамовтың үҙенең артынан эйәртеп йөрөтөү көсө барлығын, буласаҡ лидер икәнен мәктәптә уҡығанда уҡ белә инек. Мәктәпте тамамлағас, күбебеҙ юғары уҡыу йорттарына кереп китте, керә алмағандарҙы Ишмөхәмәт Өфөнөң комсомол ҡала комитетына алып барып, комсомол йүнәлтмәләре алып бирешеп, 21-се төҙөлөш тресына эшкә урынлаштырҙы. Егеттәребеҙгә дөйөм ятаҡ Өфөлә булды, ә ҡыҙҙарҙы йыраҡтағы Александровка тигән ерҙә урынлаштырҙылар. Әлеге Ишмөхәмәт ойошмаларға йөрөп, ҡыҙҙарға ла Өфөнән дөйөм ятаҡтар алырға ярҙам итте. Был класташыбыҙ, юғары белем алып, республикабыҙҙа төрлө етәксе эштәрҙә эшләне. Әле лә ул эшләп йөрөй, кешеләргә хеҙмәт итә.

Өфөлә урынлашҡан класташтар һәр байрамды бергә үткәрҙек. Тыумышы менән Яманһары ауылынан булған яратҡан класс етәксебеҙ Ришат Хәмит улы Мәғәзовтың бер туған һылыуы Шәүрә апайҙа йыйыла торғайныҡ (Атай һымаҡ күргән етәксебеҙҙең туғандары менән туғанлашып бөткәйнек).

Бына шулай беҙҙең һабаҡташтар: бер кластан ике министр, полковник, подполковник сыҡты. Ҡалғандарыбыҙ ҙа был тормошта үҙ урынын табып төрлө тарафтарҙа хөкүмәт эшендә матур итеп эшләне, ғаилә ҡорҙо, балалар үҫтерҙе. Хәҙер һәр ҡайһыбыҙ ейән-ейәнсәрҙәр тәрбиәләшеп ятабыҙ.

Зөһрә, Зилә, Мөхтәрәмә, Мәүлиҙә үҙҙәренең тәүге никахтарына тоғро ҡалып, яңғыҙ ғына балаларын үҫтерҙеләр, әле шул балаларҙың балаларын ҡарашып, шатлыҡ ҡыуаныстарҙа йәшәйҙәр.

Осрашҡан һайын 40 атаның балаларының алыштырғыһыҙ класс етәксеһе Ришат Хәмитович менән уның ҡатыны Миңһылыу апаны хәтерләп алабыҙ. Иҫән саҡтарында һәр осрашыуға киләләр ине.

53 йылдан һуң да беҙҙең арала туғанлыҡ, яҡынлыҡ хистәре һаман һаҡлана, бындай татыулыҡ ҡайһы бер туғандар араһында ла юҡтыр. Киләһе йылда осрашыуға пландар ҡороп, бер-беребеҙгә сәләмәтлек, бәхетле ҡартлыҡ теләп айырылыштыҡ.