Все новости
Шәжәрә
28 Ноября 2016, 02:34

БЕР АҒАСТЫҢ ЯПРАҠТАРЫ

24 ноябрҙә ҡаланың «Рассвет» мәҙәниәт һарайында йыл да үткәрелеп килгән һәм традицияға әүерелгән сираттағы «Шәжәрә байрамы» уҙғарылды.

24 ноябрҙә ҡаланың «Рассвет» мәҙәниәт һарайында йыл да үткәрелеп килгән һәм традицияға әүерелгән сираттағы «Шәжәрә байрамы» уҙғарылды. Быйылғы байрам Әсә көнөнә һәм Кино йылына арналды.
Сәхнәгә быйыл 4 ғаилә — Дашкиндар, Байтуғановтар, Маликовтар һәм Ғәббәсовтар ғаиләләре үҙҙәренең шәжәрәләрен күрһәтергә сыҡты. Ҡала хакимиәтенең мәҙәниәт бүлеге начальнигы Татьяна Лихачева конкурсанттарҙы тәбрикләп, уңы-штар теләне һәм бар әсәләрҙе лә яҡынлашып килгән байрамдары менән ҡотланы. «Байрамға әҙерләнеү дәүерендә ғаиләләр ата-бабалары һәм үҙҙәренең сығышы хаҡында күп нәмә белә. Шулай уҡ бындай байрамдар ғаиләләрҙе нығытыуға ла ҙур өлөш индерә», - тине ул.
Иң тәүгеләрҙән булып сығыш яһаған Дашкиндар ғаиләһе үҙҙәренең нәҫел-нәсәптәрен бик тәрән өйрәнеүҙәрен дәлилләне. Уларҙың ырыуҙарында данлыҡлы кенәздәр ҙә, генералдар ҙа, вулканологтар һәм башҡа бик күп билдәле шәхестәр ҙә булған һәм бар. Ғаилә башлығы — Фәнүс Дашкин, хатта, үҙҙәренең генетик кодтары, ДНК-ларына хәтлем өйрәнгән.
Байтуғановтар ғаиләһе сыуаш халҡының көнкүреше, аш-һыу үҙенсәлектәре һәм байрамдарына бәйләп, тамырҙарының килеп сығышы хаҡында өләсәйҙәре һөйләгән видеояҙма тәҡдим итте.

РПЛИ-ла белем алған Наҙгөл һәм Нәркәс ҡыҙҙары менән бергә байрамда сығыш яһар өсөн Федоровка районы Яңы Яуыш ауылынан Маликовтар ғаиләһе килгән. Улар 7 быуындарын бик яҡшы өйрәнеүҙәре һәм артабан да был эште дауам итеүҙәре хаҡында хәбәр итте. Шулай уҡ был ғаилә йыр-бейеүҙәре, мандолинала уйнауҙары менән бар тамашасыны хайран ҡалдырҙы.

Ғәббәсовтар ғаиләһе «Шәжәрәһен белмәгәндең киләсәге юҡ», - тип һәм Әсә көнөнә арнап, Күгәрсен районы Дауыт-Ҡайып ауылында йәшәгән әсәйҙәре яғынан Сәғитовтар шәжәрәһен ентекле өйрәнеүҙәрен күрһәтте. Ата-бабаларының үткәнен өйрәнеүгә уларҙы ҡаланың 5-се мәктәбенең 3-сө класында белем алыусы ҡыҙҙары этәргән икән. Был улар төшөргән видеояҙмала ла асыҡ сағыла.

Һәр ғаилә аш-һыуға маһирлығын үҙҙәре әҙерләп алып килгән төрлө-төрлө халыҡтың яратҡан тәм-томдары аша иҫбатланы.

Ғаиләләр быйылғы «Шәжәрә байрамы»на шул тиклем ентекле әҙерләнгән, жюри ағзаларына еңеүселәрҙе билдәләүе ауыр булған, күрәһең. Шуға ла уларҙың барыһы ла төрлө номинация еңеүселәре итеп танылды. Күмертау башҡорттары ҡоролтайы башҡарма комитеты рәйесе Әлфиә Фәйзрахман ҡыҙы Шәмиғолова: «Байрамдың күп милләтле булыуы ҡыуаныслы. Ғаи-ләләрҙең үҙ тамырҙарын яҡшы белеүҙәренә, уларҙы һаҡлауҙарына рәхмәт», - тине, Әсә көнө менән ҡотланы. Ул мәктәп, балалар баҡсаһы, китапхана етәкселәренә һәм хеҙмәткәрҙәренә сараны ойоштороуҙа оло ярҙам күрһәткәндәре өсөн Рәхмәт хаттары тапшырҙы.

Шулай итеп, Маликовтар «Ғаилә йолаларын һәм мәҙәниәтен һаҡлау, шәжәрәләрҙе өйрәнеү һәм таратыу өсөн», Ғәббәсовтар «Күмертау ерендә быуындар күсәгилешлеген һаҡлау», Дашкиндар «Шәжәрәне фәнни-ғилми яҡтан тәфсирле өйрәнеү һәм белеү», Байтуғановтар «Быуындар күсәгилешлеген һаҡлау һәм халыҡ традицияларын тергеҙеү» номинацияларында билдәләнде, ҡиммәтле бүләктәргә эйә булды.

«Юшатыр» гәзитенең махсус призы Ғәббәсовтар ғаиләһенә бирелде, ә Күмертау башҡорттары ҡоролтайы башҡарма комитеты үҙенең бүләген Маликовтар ғаиләһенә тапшырҙы.


Байрам сараһын үткәреүҙә финанс ярҙам күрһәтеүселәр:

Күмертау башҡорттары ҡоролтайы башҡарма комитеты (рәйесе Әлфиә Шәмиғолова), ҡаланың татарҙар конгресы (рәйесе Әнүәр Дауытов), сыуаштар йәмғиәте (рәйесе Виктор Гаврилов), «Акрополь» йәмғиәте (генераль директоры Хәйҙәр Ғайсин), «Яркий мир», «Азимут» йәмғиәттәре.
Читайте нас: