АТА-БАБАЛАР ЙОЛАҺЫ ОНОТОЛМАЙ

Бәйгелә 4 ғаилә ҡатнашты. Йыл һайын уларҙың сығыштарын ҡарап, арабыҙҙа шундай матур ғаиләләр булыуы өсөн ғорурланып, һоҡланып ҡайтаһың. Был юлы ла беҙҙең ғаиләләр бик матур сығыш яһаны. Сығыштарҙы ҡарап ултырыуы ғына рәхәт, ә уны әҙерләү өсөн күпме көс түгелгәнен тик үҙе шуның аша үткән кеше генә белә. Мәҙәниәт һарайы фойеһында әҙерләнгән бай күргәҙмә генә лә бик күпте һөйләй. Аш-һыуҙың, күҙҙең яуын алып торған бәйләнгән, сигелгән, һуғылған ҡул эштәренең ниндәй генә төрө юҡ унда.

Байрам сараһын асып ҡала хакимиәте башлығы урынбаҫары Наталья Лапшина тәбрикләне һәм конкурсты ойоштороуҙа ҙур ярҙам күрһәткәндәргә Рәхмәт хаты тапшырҙы.

Быйылғы «Шәжәрә байрамы»нда 5-се мәктәптә уҡыусы ҡыҙҙары Наҙгөл һәм «Айгөл» балалар баҡсаһына йөрөүсе 2 йәшлек Алһыу ҡыҙҙары менән Рөстәм һәм Айгөл Халиҡовтар, 1-се гимназияла уҡыған ҡыҙҙары Ангелина һәм улдары Дима менән Михаил һәм Наталия Васильевтар, 1-се гимназияһы уҡыусылары Валерия, Виталина һәм балалар баҡсаһы тәрбиәләнеүсеһе Савелий менән Евгений һәм Наталья Селищевтар, 3-сө мәктәптә белем алыусы Әҙилә ҡыҙҙары менән Алһыу, Әлфиә, Ҡәнифә Ҡужаҡовтар ғаиләләренең һәр береһе үҙҙәренең шәжәрәләрен тулы өйрәнеүҙәрен һәм төрлө яҡлап талант эйәләре булыуын асып һалды.

Конкурс ҡалала үткәрелһә лә, район менән бәйләнеш күҙгә ныҡ ташлана ине. Мәҫәлән Васильевтар өсөн Керәүленән, ә Халиҡовтар өсөн Илкәнәйҙән бер ауыл тиерлек көйәрмәндәр йыйылғайны. Был күренеш беҙҙең барыбыҙҙың да ауылдан сыҡҡаныбыҙ тураһында һөйләй. Ғаиләләрҙең һәр сығышы дәррәү алҡыштар менән оҙатылды. Бәйгелә ҡатнашыусының һәр береһе үҙ ғаиләһенең тарихын сағылдырған видеояҙма, үҙҙәренең ҡулы менән бешергән башҡорт, урыҫ, сыуаш милли ризыҡтарын тәҡдим итте. Селищевтар, хатта, сәхнәлә үк ҡоймаҡ ҡойҙо.

Жюри ағзаларына еңеүсене билдәләүе ауыр булғандыр, күрәһең, сөнки һәр бер ғаилә был еңеүгә лайыҡ ине.

Шулай итеп, 23 быуынын өйрәнгән Халиҡовтар ғаиләһе «Шәжәрә төҙөүҙә ғаилә ҡомартҡыларын файҙаланғаны өсөн», Васильевтар «Быуындар бәйләнеше һәм ғаилә йолаларын һаҡлағаны өсөн», Селищевтар «Шәжәрә төҙөүгә ижади ҡараш һәм үҙенсәлек өсөн», Ҡужаҡовтар ғаиләһе «Шәжәрәләрен тәрән өйрәнгәне өсөн» номинациялары еңеүселәре тип табылды.

Йырлы-моңло, милли рухлы, быуындар бәйләнеше менән һуғарылған бәйге күңелдәрҙә матур тойғолар ҡалдырып үтеп китте. Борондан ҡалған ата-бабаларыбыҙ йолаһы әле лә йәшәүе өсөн беҙгә шатланырға ғына ҡала.

Әмәкәсова Рәмилә, 3-сө БРГИ уҡытыусыһы;