Булдыҡлылар кәрәк

Cход үткәрергә сират Ҡансыраға етте. Бында ла ауыл башлығының доклады, килгән власть вәкилдәренең сығышы тыңланды. Барыһы ла тышта башҡарылды - клубта ремонт бара, реаль эштәр программаһы буйынса ишек-тәҙрәләрен яңырталар. Ямғыр һибәләңкерәп аҙыраҡ әҙәмде ҡурҡытып алһа ла, ныҡлап яуманы. Бәлки, яуырға кәрәк булғандыр, йыйылған халыҡтың ҡыҙыулығын баҫырға. Көтөү ерҙәрен ниңә фермерҙарға биреп бөтәһегеҙ ул, тип даулаштылар. Беҙгә ҡайҙа малды ҡыуырға? Һыу мәсьәләһе бик ҡырҡыу - бер урамда йәй буйы һыу тигәнде күрмәйҙәр тиерлек. Йәй көнө һыу етмәй, ә ҡышын һыу ағып ята, ҡайҙа итергә белмәйбеҙ, тиҙәр. Күмертау эргәлә генә, цивилизацияға яҡын йәшәйәбеҙ, ә телефон менән һөйләшеп тә булмай - кәрәҙле бәйләнеш юҡ. Ә юлды ҡарағыҙ, ҡышын тулыһынса ҡар тултыра ла китә, беҙҙә ел ныҡ көслө иҫә, ҡалаға илткән юлды күтәртергә кәрәк.