БЕҘ ҺЕҘҘЕ ИШЕТӘБЕҘ

Рәжәп Рамаҙан улы ЮЛБАРИСОВ, СССР-ҙың һаулыҡ һаҡлау отличнигы, БР-ҙың атҡаҙанған врачы, С. Юлаев ордены кавалеры, Яңы Мораптал ауылы:

– «Юшатыр»-ҙы тәү сыға башлаған көндән бирле алдырам. Дөрөҫ гәзит, хәбәрселәрҙең теле үткер, ҡояшты ҡояш, айҙы ай кеүек күргән кеүек, проблемалар нисек бар — шулай асып һалына. Гәзит хакимиәттең бер бүлеге түгел, уның ғына эшен күрһәтеп, маҡтап торорға ярамай, тәнҡит тә кәрәк. Кешегә мәғлүмәт биреп кенә ҡалмай, тәрбиәүи әһәмиәткә эйә булырға тейеш. «Юшатыр» булмаһа, беҙҙең халыҡ район, ҡала тормошон, йәшәйешен, ысынбарлыҡты белмәҫ ине. Бөгөн бит халыҡты ҡайғыртыусы юҡ. Етәкселәр хужалыҡ менән генә етәкселек итә, йәғни иген үҫтерә, мал аҫрай, тип әйтмәксемен. Кешеләр үҙҙәре лә бер-береһе менән аралашып бармай. Хәҙерге заманда әҙәм балаһы коттеджда йәшәй, джипта йөрөй, кейергә, ашарға — һәммәһе лә бар, тик изгелек, ышаныс, ғәҙеллек, намыҫ тигән төшөнсәләр онотолдо. Малы ауырыһа, хужаһы ҡарай, юғалһа, эҙләй, кеше юғала икән, уны ҡайһы саҡ эҙләп тә тормайҙар.

Хәбәрселәргә әйтер теләктәрем дә юҡ түгел. Заманында Ленин орденына лайыҡ булған атаҡлы комбайнсылар, егелеп эшләгән алдынғы һауынсылар, ме-ханизаторҙар күп. Беҙҙең ауылда Фәрхетдин Ҡәҙерғолов кеүек иретеп йәбештереүсе булманы. Бөтә ауыл халҡының йорттарына бушлай йылытыу торбалары индерҙе, ҡапҡалар яһаны ул. Тәлғәт Ҡәҙерғолов, Юнир Зәбиров һымаҡ тракторсылар һәр ауылда бар. Шулар кеүек кешеләр хаҡында ла яҙырға кәрәк, йәштәр белһен.

Редакциянан: Гәзиткә яҙылыу осоро ҡыҙған саҡ. Милләттәштәребеҙ барыһы ла «Юшатырҙан» айырылмаҫ, тип уйлайбыҙ. Беҙ ул - һеҙ, йәғни милли баҫма бар икән, милләт тә йәшәй. Артабан да бергә ҡалайыҡ, «Юшатыр» биттәрендә кәңәшләшәйек, бәхәсләшәйек, бер һүҙгә киләйек - үҙебеҙҙе үҙебеҙ ҡайғыртайыҡ. Беҙ һәр саҡ асыҡ трибуна булдыҡ һәм алда ла шулай буласаҡ. Яҙығыҙ, шылтыратығыҙ. Беҙ һеҙҙе ишетәбеҙ.