ПОЛИЦИЯҒА ХӘҘЕР РӘХӘТЕРӘК БУЛЫР

ҙна башында үткән комиссияла район Советы секретары Әхәт Исламғоловтың ирекле халыҡ дружиналары (ДНД) хаҡында һөйләүен әҙерәк яҙып киткәйнек. Бөгөн был темаға әйләнеп ҡайтып, уларҙың эштәре, бурыстарына туҡталып үтмәксебеҙ.

Әхәт Әхтәм улының сығышынан күренеүенсә, бөгөнгө көндә һәр бер ауыл советында социаль-профилактик үҙәктәр, эскелек менән көрәш комиссиялары, ДНД-лар һәм башҡалар төҙөлгән. Граждандарҙың йәмәғәтселек тәртибен һаҡлауҙа ҡатнашыусыларға шарттар тыуҙырыу өсөн ағымдағы йылдың 2 июленән «Йәмәғәтселек тәртибен һаҡлауҙа граждандарҙың ҡатнашлығы» Федераль законы, ә 2015 йылдың 30 июнендә «Башҡортостан Республикаһында халыҡ дружинаһы тураһында» закондары үҙ көсөнә инде. Законға ярашлы, йәмәғәт тәртибен һаҡлаған саҡта, дружинниктың танытмаһы йәки айырым билдәһе булырға тейеш. Бик кәрәк саҡта ғына ул законға ярашлы физик көс ҡуллана ала. Ә бының өсөн ДНД-ны региональ реестрға ҡуйырға кәрәк.

Законды үтәү һәм полиция хеҙмәткәрҙәренә ярҙам итеү өсөн районда 192 кешенән торған ирекле халыҡ дружинаһы төҙөлгән. Дөйөм йыйылышта уларҙың уставы, эш маҡсаттары, хоҡуҡтары һәм бурыстары билдәләнгән.

ДНД-ның төп бурысы булып граждандарҙың шәхси хәүефһеҙлеген тәьмин итеү, хоҡуҡ боҙоу һәм енәйәттәрҙе иҫкәртеү һәм туҡтатыу, хоҡуҡ һаҡлау органдары менән тәрбиә эштәре алып барыу. ДНД-ның төп эше — урамдарҙа патруллек итеү, профилактик рейдтарҙа, күмәк халыҡ булған сараларҙа ҡатнашыу (Һабантуйҙа быйыл дружинниктар әҙерәк эш күрһәткәндәр), бәлиғ булмаған хоҡуҡ боҙоусылар һәм имен булмаған ғаиләләрҙе шефлыҡҡа алыу.

Республика законы буйынса муниципаль районда 15 кешенән торған штаб төҙөлгән. Уның етәксеһе — Әхәт Исламғолов, урынбаҫары — Вячеслав Заварзин, секретары — Ирек Мөхәмәтшин, ә ҡалған 12-һе силсәүит башлыҡтары.

Әхәт Исламғолов: «ДНД бер ауыл советында ла эшләмәй. Ермолаево, Мораптал силсәүиттәрендә дружинниктарға материаль яҡтан әҙерәк дәртләндереү саралары ла булдырырға маташып ҡаранылар ҙа уныһын да туҡтаттылар. Хәҙер улар һирәк-һаяҡ мәҙәни сараларҙа ғына күренеп ҡала», - тине. Алдағы һандарҙа яҙып үткәнемсә, Бахмут силсәүите башлығы Нурия Шәрипова: «Беҙҙә дружинниктар эшләй. Бер сара ла уларһыҙ үтмәй», - тине.

Шулай итеп, ҡайһы бер ауыл советтарында улар, ысынлап та эшләй, тик эштәре документаль рәүештә күрһәтелеп кенә бармай булып сыға.

Яңы йыл байрамдары яҡынлашыуы, шуға күрә дружинниктар эшен тергеҙергә, уның өсөн төрлө ойошма, учреждениелар етәкселәрен йәлеп итеү кәрәклеген дә әйтте Әхәт Әхтәм улы. Шулай уҡ материаль яҡтан дәртләндереү сараһын булдырмайынса, был эште яйға һалып булмаясағы, уларға отпускыға өҫтәмә көндәр ҡушыу, өҫтәмә ял, аҡсалата ярҙам итеү сараларын да уйларға кәңәш ителде. «Уҡыусыларҙың ата-әсәләрен, педагогик коллективты йәлеп иткәндә яҡшы булыр ине. Йыл аҙағына хәтлем танытма бирергә тырышасаҡбыҙ, ә уның өсөн беҙгә дружинниктарҙың иҫәбен белеү кәрәк», - тине ул һәм Ермолаево силсәүитенә — 20, Мораптал менән яҡшымбәттәргә — 15, башҡа силсәүиттәргә 10-ға тиклем кеше һайлап ҡуйып, ДНД-ны әүҙемләштерергә, тигән тәҡдимен индерҙе.

Ҡалала ДНД-лар һәр ваҡыт даими эшләп килә. Күмертауҙа әлеге көндә ДНД-ның 4 пункты эшләй. Һәр көн һайын бында төрлө ойошма, предприятие, учреждениеларҙан йәлеп ителгән хеҙмәткәрҙәр килеп, участковыйҙар менән бергә имен булмаған ғаиләләргә рейдҡа сығалар. Бының өсөн дружинниктарға эш урындарынан отпускыға өҫтәмә ял көнө бирелә.

Шулай итеп ДНД әүҙемләшә башлаһа, полицияға ла хәҙер эшләүе рәхәтерәк булыр.

ХАЛЫҠ ЙӘШӘГӘН УРЫНДА