Юшатыр
-18 °С
Облачно
75 лет Победы
Все новости
Социаль мөхит
3 Ноября 2017, 13:55

ҠАРТТАРЫБЫҘ ЯҢҒЫҘЛЫҠТАН ҠОТОЛОР

Ишеткәнһегеҙҙер, «Башҡортостан Республикаһында оло йәштәге граждандар һәм инвалидтар өсөн ҡабул итеүсе ғаиләләр тураһында»ғы закон 2016 йылда уҡ ҡабул ителгәйне. Быйыл йәй был эште башҡарыу тәртибе раҫланды.

Ишеткәнһегеҙҙер, «Башҡортостан Республикаһында оло йәштәге граждандар һәм инвалидтар өсөн ҡабул итеүсе ғаиләләр тураһында»ғы закон 2016 йылда уҡ ҡабул ителгәйне. Быйыл йәй был эште башҡарыу тәртибе раҫланды.

Социаль хеҙмәтләндереү үҙәктәрендә яҡынса 1 меңдән ашыу кеше йәшәй, ә мохтаждар һаны байтаҡ. Төбәктә 900 меңдән ашыу пенсионер иҫәпләнә, уларҙың һәр бишенсеһенә ярҙам талап ителә. Ҡарттарҙы ҡарарға теләүселәрҙән ғаризалар ҡабул итеү, ололарҙы урынлаштырыу мәсьәләләре менән республика социаль хеҙмәтләндереү үҙәктәре, опека һәм попечителлек органдары шөғөлләнә.

Социаль ярҙамға Башҡортостанда ғүмер итеүсе 65 йәште уҙған һәм сәләмәтлегенә бәйле үҙен-үҙе ҡарай алмаған өлкәндәр һәм инвалидтар дәғүә итә ала. Үтә етди һәм бик ентекле һайлау үткәндән һуң, республикабыҙҙа йәшәгән, һәр ғаилә яңғыҙ оло кешене тәрбиәгә алыу мөмкинлегенә эйә була аласаҡ. Опекун ғаиләгә ай һайын 6200 һум күләмендә аҡса түләнәсәк. Әгәр ҡабул итеүсе ғаилә 80 йәштән олораҡ кешене йәки беренсе төркөм инвалидын ала икән, закон тарафынан ошо түләү 30 процентҡа тиклем арттырыласаҡ. Килешеү төҙөгән саҡта ғаиләгә алынған пенсионер үҙенең пенсияһының күпме өлөшөн ғаилә бюджетына бирәсәге лә күрһәтеләсәк. Опекун ғаиләләрҙең эшмәкәрлеге даими контролдә тотоласаҡ.

Шулай уҡ ғаилә ҡабул итеп алған бабай йәки әбей туған-тыумаса булырға тейеш түгел, йәғни ҡарт атай-әсәйеңде йәки оло йәштәге ағай -апайыңды ҡараған өсөн дәүләт ярҙамына өмөт итеү килеп сыҡмаясаҡ. Шулай уҡ хөкөм ителгән, эсергә яратҡан, наркотик матдәләр ҡулланған, психик сирлеләр проектта ҡатнаша алмай. Быға тиклем бергә йәшәүселәр ҙә социаль программанан ситтә ҡала.

Республиканың хеҙмәт һәм халыҡты социаль яҡлау министры Ленара Иванова: «Ҡабул итеүсе ғаиләлә йәшәү оло йәштәге граждандарҙың уңайлы һәм ғәҙәти йәшәү шарттарын булдырыуға тәьҫир итәсәк. Айырыуса ауыл ерендә уларҙың йәшәү сифатын яҡшыртасаҡ, үҙ-ара ярҙам йолаларын нығытасаҡ һәм социаль яңғыҙлыҡты иҫкәртәсәк», – ти. Министрҙың әйтеүе буйынса, был механизм Рәсәйҙә тик ике тиҫтә төбәктә генә ҡулланыла.

«Оло йәштәгеләрҙе һәм инвалидтарҙы ғаиләгә алыу социаль хеҙмәтләндереү йорттарына булған сиратты кәметәсәк», - тип билдәләнде Республика Хөкүмәте йортондағы Президиум ултырышында. Тимәк, яңы ҡанундың үтәлеше дәүләт ҡаҙнаһына көсөргәнешлекте кәметәсәк.

Күмертау ҡалаһында оло йәштәгеләрҙе ғаиләгә алыу эше менән «Ғаиләгә һәм балаларға социаль ярҙам» бүлеге шөғөлләнә. Һорауҙар менән Ленин урамы, 23-сө һанлы йортҡа йәки 4-68-62 номерҙары аша мөрәжәғәт итә алаһығыҙ. Күмертауҙа әле нисә кеше ундай ярҙамға мохтаж икәнен дә белешеп ҡарағайныҡ, ундай мәғлүмәт беҙҙә юҡ, тинеләр. Әлеге көндә 2 ғаилә пенсионерҙы алырға теләк белдергән.

Көйөргәҙе районы буйынса документтарҙы Ермолаевоның Совет урамындағы 161 А йортонда урынлашҡан приют хеҙмәткәрҙәре ҡабул итә. Бер ғаилә пенсионерҙы алырға, бер ир ғаиләгә барырға теләк белдергән дә инде. Һорауҙарығыҙ булһа, 6-23-76 телефон номерҙарын йыйып белешергә лә була. Район буйынса мохтаждарҙың иҫәбен бында ла белеүсе юҡ.

Шулай итеп, был яңы проект ғүмер көҙөн кисереүселәрҙең йәшәү шарттарын яҡшыртыр, ниһайәт, ҡарттарыбыҙ яңғыҙлыҡтан ҡотолор һәм уларға тейешле иғтибар бүленер, тигән ышаныста ҡалабыҙ.
Әле Рәсәйҙә халыҡтың хеҙмәт йәшенән олораҡ өлөшө 23,5 процент булһа, 2021 йылға был күрһәткес 26,7 процентҡа етәсәк, тип күҙаллана. Һөҙөмтәлә социаль хеҙмәтләндереүгә мохтаж кешеләр һаны ла арта бара. Башҡортостанда 2008 йылда ундайҙар 224 мең кеше булһа, былтыр ошо күрһәткес 384 меңгә етте. Уларҙың күпселеген ҡарттар һәм инвалидтар тәшкил итә.
Башҡортостанда оло йәштәгеләр һәм инвалидтарҙы ғаиләләргә алыу буйынса “ҡыҙыу линия” эшләй башланы. Һорауҙарға Хеҙмәт һәм халыҡты социаль яҡлау министрлығы белгестәре яуап бирә. Ошо мәсьәлә буйынса эш көндәрендә 8-347-218-06-87 йәки 8-347-286-21-73 телефондары буйынса шылтыратырға була.
Быйыл 24 ҡабул итеүсе ғаилә, 2018 йылда – 124, 2019 йылда 154 бындай ғаилә булдырыу ҡаралған.
Читайте нас в