Һары ғына бәпембәләр
Себештәй башын бороп.
Юлдарыма теҙелгәндәр
Тырпайған башын һоноп.
Ҡояш апай иркәләүгә
Асҡандар керпектәрен.
Әйтерһең дә инә өйрәк
Иркәләй себештәрен.
Күктә - ҡояш, ерҙә - сәскә,
Икеһе лә нур сәсә.
Бар донъяға әйтерһең дә
Сафлыҡ, паклыҡ өләшә.
Күҙ ҡарашым наҙҙарында -
Бәпембәләр - бәпкәләр.
Әйтерһең йәшел үләнгә
Һибелгәндәр тәңкәләр.
Бал ҡорттарын ымһындырып,
Ҡояш йылыһын тойоп.
Бәпембәләр күҙен аса
Тырпайған башын бороп...
Руша СОЛТАНҒОЛОВА
Күмертау ҡалаһы