ХӘТӘР ШАЯРТТЫЛАР

Өфө, Стәрлетамаҡ, Мәләүез, Красноусольскийҙан килгән балалар командалары тырышып сығыш яһаны. Улар араһында Күмертауҙан РПЛИ командаһы ҡатнашыусыларын да күреү бик шатлыҡлы ине.

Биш команда ғына ҡатнашһа ла, мәҙәни сара бик матур, күңелле үтте. Хәтәр шаяртты йәштәр. Шаяртыуҙары тәрән мәғәнәле.

Иң мөһиме: уйын аҙағынан Республикабыҙҙа туған телдә «Шаяниум»ды үҫтереүсе егеттәр, балаларҙы йыйып, уларҙың маҡтаған яғын маҡтап, етешһеҙлектәре өҫтөндә эшләү буйынса кәңәштәрен бирҙе. Афарин! Егеттәргә ҙур рәхмәт!

Үҙебеҙҙең ҡала өсөн ҡыуанып ҡайттым: беҙҙә үткәрелгән ярымфинал уйындары, Аллаға шөкөр, тулы залдарҙа үтте. Ә бына Мәләүездәге иҫ китмәле мәҙәниәт һарайы залы буш тиерлек ине. Бында сараны ойоштороусылар тамашасыларҙы сараға йәлеп итеү яғын ныҡлап уйлап еткермәгән, күрәһең. Әллә башҡа берәй сәбәптәр бармы?

5-СЕ МӘКТӘП БЕРЕНСЕ

8 октябрҙә Өфө ҡалаһында Юниор КВН лигаһының ҙур фестивале үтте. Республика район ҡалаларынан 24 команда ҡатнашҡан сарала Күмертауҙың 5-се мәктәбенең “Пятки” командаһы ла көс һынашты. Фестивалдә гран-приҙы Ағиҙел ҡалаһы алһа, 1-се урынды күмертауҙар яуланы. “Пятки” командаһы Республиканың Йәштәр сәйәсәте һәм спорт министрлығының Почет грамотаһы һәм 2017-2018 уҡыу йылы миҙгелендәге уйындарҙа ҡатнашыу хоҡуғына эйә булды.