ҺӘР ЯҠЛАП ТА УҢҒАН

Руслан Камил улы хужалыҡҡа иретеп йәбештереүсе булып 1999 йылда уҡ килә. 2001 йылда әрмегә алынып, 2003 йылда хәрби бурысын үтәп ҡайтҡан йәш егет ошо уҡ хужалыҡта тракторсы булып эшләй башлай. Киров хужалығының 2-се бригадаһы бригадиры Урал Фәүрәт улы Ғәлимов уның тураһында: «Һәр яҡлап та уңған егет бик яҡшы эшләй. МТЗ — 1221 тракторында яҙғы сәсеүҙән башлай һәм тырматыу, культивация эштәрен дә башҡара. Бесән, сенаж, силос әҙерләгәндә лә ул ярҙам итә. Ниндәй генә эшкә тотонһа ла, күрһәткестәре һәйбәт була. Ҡайһы бер йәш егеттәр кеүек тегендә-бында һуғылып йөрөмәне ул, йәш сағынан беҙгә килде һәм һаман да тырышып эшләүен дауам итә. Күптән түгел генә уға яңы алып ҡайтҡан Акрос — 550 комбайнын бирҙек. Әле шуның менән ең һыҙғанып көнбағыш баҫыуҙарын иңләй. Ике ҡыҙ, бер ул үҫтергән Руслан ғаиләһендә лә өлөгөлө атай, ҡатынына ышаныслы тормош иптәше», - тигән йылы һүҙҙәрен еткерҙе.