ОНОТОРҒА ТЕЙЕШ ТҮГЕЛБЕҘ

Сараны асып, КПРФ-тың Көйөргәҙе районы ойошмаһы етәксеһе Николай Варнавский:

- Советтар осоронда күп заводтар төҙөлдө, колхоздар ойошторолдо. Революция халыҡҡа бушлай уҡыу, дауаланыу мөмкинлектәре бирҙе. Уның әһәмиәте ҙур. Шуға күрә беҙ уны оноторға тейеш түгелбеҙ, - тине. Район Советы секретары Әхәт Исламғолов та, беҙ барыбыҙ ҙа совет иле балалары тип, йыйылыусыларҙы район хакимиәте һәм Советы исеменән ҡотланы.

- Октябрь революцияһы - мөһим тарихи ваҡиға, - тине ул. – Ул беҙҙең илебеҙгә генә түгел, ә барлыҡ донъя илдәренең тарихына ҙур йоғонто яһаны.

Сараға райондың элекке хакимиәт башлығы Раил Әбдрәшитов та килгәйне.

– Беҙҙең быуын кешеләрен байрам менән ҡотлайым. Совет заманында төҙөлгән күп нәмәләрҙе хәҙер юҡҡа сығаралар, емерәләр. Беҙ сит ил әйберҙәрен һатып алабыҙ, уларҙың машиналарында йөрөйбөҙ. Завод-фабрикалар ябыла, кешеләр эшһеҙлектән Себергә китә. Колхоз, совхоздар тарҡалды. Беҙҙең ата-бабайҙар алйот булғанмы ни колхоз төҙөгәндә? Улар бит ошолай йәшәү яҡшыраҡ икәнен белеп эшләгән. Мин киткәндә районда 7 колхоз, 5 совхоз бар ине, әле шуларҙың икәүһе генә ҡалды, - тине ул.

Районыбыҙҙың ветерандар советы рәйесес Алексей Тарасов та телмәр тотто. Унан һуң да һөйләүселәр табылды. Барыһының да фекере бер булды был көндө – революция йәшәй һәм йәшәйәсәк!