БАРЫҺЫ ЛА ЕҢЕҮГӘ ЛАЙЫҠ

Визитка һәм ижади конкурс тип аталған өлөштә бәйгеселәр баһалама ағзаларын һәм тамашасыларҙы ғаиләләренең барлыҡҡа килеү тарихы менән таныштырҙы, үҙҙәре лә, бәләкәстәре лә нәфис һүҙ һѳйләүҙә, йыр-бейеүҙә, спорт тѳрҙәрендә маһирлыҡтарын асып һалды. Артабан конкурсанттар эргәләге кафела кулинария оҫталығын күрһәтеп, ғаиләләре менән торт биҙәү йәһәтенән ярышты. Урындағы тарих һәм тыуған яҡты ѳйрәнеү музейында кемдәр ҡыҙығыраҡ фотоға төшөү буйынса фотосессия ла үҙенсәлекле булды. Спорт тѳрѳ дартста ла, филологик белем буйынса ла, пазлдар йыйыуҙа ла ярыш кѳсѳргәнешле барҙы. Кемдәрҙер бер конкурста уңышҡа ѳлгәшһә, икенсе тѳрѳндә башҡалар ѳҫтѳнлѳк алды. Һәр ғаилә лә еңеүгә лайыҡ, ләкин бәйге булғас еңеүсеһеҙ булмай. Ярышта дѳйѳм балл йыйыу һѳҙѳмтәһе буйынса Альберт һәм Светлана Темуршоевтарҙың берҙәм ғаиләһе иң юғары күрһәткескә ѳлгәште. Башҡа ғаиләләр тѳрлѳ номинацияларҙа билдәләнде. Еңеүселәргә район хакимиәте тарафынан әҙерләнгән дипломдар һәм ҡиммәтле бүләктәр тапшырылды.