ТАҒЫ ЛА БЕҘҘЕКЕЛӘР

Ошо көндәрҙә Башҡортостан Башлығы Рөстәм Хәмитов республиканың Йәмәғәт палатаһы аппараты етәксеһе итеп яҡташыбыҙ Радик Юлбаевты тәғәйенләне. Радик Зиннәт улы 1981 йылда Көйөргәҙе районы Иҫке Мораптал ауылында тыуған. БДПУ-ны тамамлаған, шунда уҡ башҡорт әҙәбиәте һәм мәҙәниәте кафедраһында уҡытҡан. Артабан ул баш ҡалабыҙҙың Киров районының 9-сы һанлы мәктәбендә директор, республиканың балалар һәм үҫмерҙәр приюты етәксеһе, Өфө ҡалаһы хакимиәтенең йәштәр эштәре буйынса комитет башлығы булып та өлгөргән. Радик Юлбаев ике бала атаһы.

Яҡташыбыҙҙы яңы вазифаһы менән ҡотларға һәм эш пландарын белешер өсөн үҙе менән бәйләнешкә сыҡтыҡ.

- Әлбиттә, бик шатмын. Мин гел йәмәғәт тормошонда әүҙем ҡатнашырға тырыштым, яңы вазифа был тәңгәлдә киңерәк мөмкинлектәр асыр, тип уйлайым. Алла бирһә, йәмғиәт һәм власть араһында ныҡлы бәйләнеш булдырыу өҫтөндә эшләйәсәкмен.

- Бындай вазифала ҙур яуаплылыҡ ята. Тәү сиратта миңә граждандар мөрәжәғәттәре менән эш итергә тура киләсәк, ә, республика халҡының әүҙем булыуын иҫәпкә алғанда, улар бик күп буласаҡ, тип күҙаллайым.

- Беренсенән, тыуған районыбыҙҙың үҙенең билдәле шәхестәре менән данлыҡлы булыуына ғорурланам. Икенсенән, Көйөргәҙелә эшһөйәр, тырыш кешеләр йәшәүенә шатланам. Тыуған еремдең артабан да һис шикһеҙ сәскә атыуын теләйем. Эш графигы тығыҙ булыу сәбәпле, ҡыҙғанысҡа ҡаршы, тыуған яҡтарға теләгән һайын ҡайтып булмай, әммә, форсат тыуыу менән, туғандарымдың, дуҫтарымдың хәлдәрен белеп торам.