ҠАЛА УРАМДАРЫ КҮРКӘМЛӘНӘ

Күмертауҙың Йырын, Пушкин урамдарындағы тротуарҙарға капиталь ремонт эшләй башланылар. Әле Йырын урамында МУП ДОР предприятиеһы юл төҙөүселәре дәррәү эш алып бара. Бындағы тротуарҙар киңәйтелә, бордюрҙар алмаштырыла. Шулай уҡ БАССР-ҙың 60 йыллығы урамында ла ошондай уҡ ремонт эштәре көтөлә. «Йырын һәм БАССР-ҙың 60 йыллығы урамдарының юлын төҙәтеү өсөн 12 мең тонна асфальт кәрәк буласаҡ. Ремонтланған һәр бер юл участкаһына гарантия бирелә. Әгәр ҙә ҡыйыш-мыйыш яҡтары табылһа, был юлға предприятие тарафынан яңынан бушлай ремонт эшләнәсәк» , - ти МУП ДОР директоры Вадим Воронцов. Шуны ла әйтергә кәрәк: МУП ДОР үҙе етештергән асфальт-бетон ҡатнашмаһын ҡуллана. Был ҡатнашма дәүләт стандарттары буйынса ғына эшләнә. Бынан тыш, тиҙҙән улар асфальт-бетон заводына яңы ҡоролмалар алырға уйлай.