+31 °С
Ясно
Йәшәйеш
19 Марта 2021, 11:30
Яҙмыштар яңғылыш булһа
Кисләтеп кенә Яңы Таймаҫтан шылтыраталар:- Кисә телевизор ҡаранығыҙмы?Телевизорҙы, дөрөҫөндә, әллә нисә йыл ҡараған юҡ, уны халыҡтың башын юрый бутай торған нәмә тип күрелә. Иң төп проблемаларыбыҙ Украина ла АҠШ. Шуға Ютубҡа күселде. Телевизорҙы хоккей өсөн генә ҡарамағанда. - Юҡ.Апайыбыҙ, донъяла былай ҙа буламы икән ни тигән кеүек, аптырап, бер аҙ һүҙһеҙ торҙо, аҙаҡ әйтте:- ДНК тапшырыуын да ҡарамайһығыҙмы, - яуапты көтөп торманы, артабан дауам итте, - кисә шунда беҙҙең районды күрһәттеләр.
...Бәләкәй саҡта кино ҡарау һирәк эләгә, шуғалыр, күргән фильмды бер-беребеҙгә һөйләй торған инек: ул шулайтып әйткәйне, тегеһе шулай тип яуап бирҙе, быныһы был яҡтан килтерептереп һуҡҡайны, тегеһе, ялтанды ла, икенсе яҡтан килтереп һалды. Шуның шикелле апайбыҙ тәфсирләп ДНК тапшырыуын һөйләй башланы. Ҡыҫҡаса, хәл былай. Бынан 44 йыл элек Ермолаево дауаханаһында ике ҡатын бала таба. Табиптар хатаһы менән, ҡыҙ балалар алмашына - бер сабыйҙы бер үгәй әсә, икенсеһен икенсе үгәй әсә күтәреп алып ҡайтып китә. Шунда кемеһелер ҡолаҡтарына шыбырлап өлгөрә: күтәргән бала һинеке түгел. Ғүмер үтә, балалар үҫә, бер ҡыҙ бер ғаиләлә (сыуаш ғаиләһе икән), икенсе ҡыҙ икенсе ят ғаиәләлә, былары башҡорт. Инде үҙҙәре лә, олоғайып, әсә булып бөткәс, 44 йыл элек булған хәлде кемдер соҡоп сығара: шулай-шулай, һеҙҙең әсәйегеҙ ул түгел. Заманы икенсе, имеш-мимеш тыңлап ултырыр саҡ түгел, ДНК бар. Ошолай исемле тапшырыу бар. Һөҙөмтәлә ДНК күрһәтә, имещ-мимеш ысын икән, ҡыҙҙар үҙ әсәләре менән үҫмәгән. Апайҙың теләге бер: шул ауылға барып, ошо ғаиләләр тураһында яҙығыҙ әле. Беҙгә лә ҡыҙыҡ булып китте, яҙғанда шәп булыр ине, үтемле материал. Иртән, эшкә килеү менән,ауыл башлығына шылтыраттыҡ (теге ҡыҙҙарҙың контакттары кәрәк). Ауыл башлығы беҙҙең дәртте һүндерҙе: яҙмаһағыҙ, яҡшыраҡ булыр ине, бер ғаиләнең был турала ишеткеләре лә килмәй, тапшырыуға ла барманылар. Ниңә иҫкене ҡутарып, йәнде яраларға?
Ҡыҙыҡмы, ҡыҙғанысмы тема тип ең һыҙғанһаҡ... Кире уйланыҡ. Үткәндәрҙә яңғылыштар үҙ хатаң менәнме, икенсе кеше хатаһы менәнме, һәр кемдә бар, уларға әйләнеп ҡайтып, булмаған яраны ҡутарып (бала белмәй, ышанып үҫкән бит инде) ҡанһыратыуҙан кемгә файҙа? Әлеге осраҡ бигерәк ҡыҙғаныс, ә икенсе яҡтан...
Яҙмыш яңғылыш яҡҡа киткән хәлдә лә аҙаштырмаһын ине - шул ғына теләк. Әсә үгәй булһа ла, тормош үгәйһетмәһен. Ике ғаиәләгә лә бәхет теләйбеҙ.
