Иген сәсәләр. Түҙмәй, яндарына туҡтаныҡ. Яндарына тигәс тә, орлоҡ тейәгән машинаһы янында бер абзый ғына тора, икенсеһе тракторҙа сәсеп йөрөй.
- Килдем инде...
- Янығыҙҙа ғына Тәүәкән дә?
- Эй, унда.... - абзыйыбыҙ ҡулын һелтәй, - әллә нимә эшләп бөттөләр, ООО яһап ҡуйҙылар. Бына һеҙҙең Урал Ибраһимов шәп етәксе ине лә, китеп барҙы - йүнле кеше беҙҙә торамы ни?
Ҡарабаев Марат. Күгәрсен, Дауыт-Ҡайып. Ошолай таныштыҡ, ҡул бирештек.
- Яманһарынанмы ни, - Марат абзый туғанын осратҡандай булып китте, - һуууу, унда Рабиға апайым йәшәй ҙә. Бында минең туғандар күп ул, Илмир менән Лена аҡ йортта эшләйҙәр. Унда барып йөрөйһөңмө? - абзый өҫ-башҡа күҙ йүгертә, хакимиәткә бара торған кешеме-юҡмы икәнен самалай, - күрһәң, уларға сәләм әйт.
Һоло сәсә инеләр. Урындағы, Ҡансыралағы, фермерға ялланған эшселәр.
Һоло тигәс, әллә урынлы, әллә урынһыҙ, инде онотолоп бөткән йыр һүҙҙәре башҡа килде:
"Ерән ҡашҡа атҡайым да,
Башын сайҡай малҡайым.
Алдарында һолоһо бөтһә,
Һыҙыла йөрәк майҡайым,
Эй-й... һыҙыла йөрәк майҡайым.
Ерән ҡашҡа атҡайым да,
Елдәр тарай ялҡайын.
Эйәрләгән егетеңде
Ташлап ҡайтма, малҡайым,
Эй-й... ташлап ҡайтма, малҡайым".