«ЙӨРӨҮСЕҺЕ ТАБЫЛЫР»

Урындаға инициативаларҙы хуплау программаһында райондың барлыҡ 12 ауыл советы ла ҡатнаша. Иҫке Отрада, ауылдарында парк етмәй тип уйлап, клубтары янындағы ағас-ҡыуаҡтарҙы аҡтарып-һурып ташлап, бында өп-өр яңы парк төҙөргә уйлай. Эскәмйәләр, фонарҙәр, клумбалар була, ти. Хаҡы 421 850 һум, 40-ар мең халыҡтан йыйылған һәм спонсорҙар ярҙамы, ҡалғаны республика бюджетынан. Эш барышын фотоға төшөргән саҡта беҙгә апаруҡ ҡына йәштәге бер апай осраны. «Тиҙҙән янған фонарҙәр аҫтында кистәрен ирегеҙ менән ҡултыҡлашып ҡына йөрөрһөгөҙ аллея буйлап», - тиһәк, «Ир юҡ, вапшы ауылда йүнлеһе ҡалманы, арыуы Себерҙә», - тип яуапланы ул. «Ярар, иң мөһиме парк булһын, йөрөүсеһе табылыр», - тип йыуатҡан булдыҡ яңғыҙ ҡатынды. Ысынлап та, матур аллея булһа, ауылға барыбер ҡамасауламаҫ, эйе бит.

Яңы Мораптал халҡы ла ППМИ программаһында ҡатнашып ята. Улар зыяратты кәртәләй башлаған. 917 760 һумға төшәсәк был эш. Был сумманың 200 меңе халыҡтан һәм спонсорҙарҙан. Ямғырҙар китте, шулай ҙа бында эшләп йөрөгән «ХОРОС» фирмаһы егеттәре былай арыу егет күренәләр. Улар ошо изге эште тамамлауҙы оҙаҡҡа һуҙмаҫ, тип уйлайбыҙ.